Taligsik sa walk with Mary, Traslacion gibaliwala

CEBU, Philippines – Wala nanumbaling sa hadla sa uwan ang mga deboto nga nangapil sa Walk With Mary kagahapon sa sayo sa buntag nga gisundan sa Traslacion gikan sa Basilica Minore del Santo Niño.

Ang Walk With Mary nanukad sa Archdiocesan Shrine of our Lady of Guadalupe agi sa Fuente Osmeña Rotunda diin nagpaabot ang dili mominus 250 mil ka deboto nga naglakaw paingon sa Basilica alas 4 pasado sa buntag. Kini gisundan dayon sa Santos nga Misa nga gidumala ni Msgr. Jose Montecillo, ang kura paruko sa Our Lady of Guadalupe Parish.

Awhag ni Montecillo sa mga deboto ang pag-ampo para sa mga masakiton ug mapasayloon usab ngadto sa mga makasasala.

Human sa misa gisunod ang Traslascion sa imahe sa Balaang Bata nga si Senior Santo Niño ug sa Birhen sa Guadalupe paingon sa National Shrine of  Saint Joseph sa Dakbayan sa Mandaue.

Si Fr. Jonas Mejares, chairman sa Sinulog Fiesta, nipadayag sa iyang dakong kalipay ug kahinangop tungod kay bisan sa hadla sa ulan wala nagpabalda ang mga deboto nga nipakita sa ilang dakong pagmahal sa Balaang Bata.

Nagtuo si Mejares nga adunay mga nasubo sa pag-usab sa rota sa Traslacion apan may nalipay sab nga sa una’ng higayon naagian sa carroza sa Balaang Bata ug sa Birhen sa Guadalupe.

Matud ni Pascual Fontanar, usa sa mga residente sa dalan A. S Fortuna, nga daku kaayo nila’ng grasya ug pasalamat sukad gisugdan ang Traslacion pipila na ka tuig ang nilabay karon pa gyud naagian ang ilang lugar hinungdan nga ila kini nga gipangandaman.

Ang mga opisyal sa Dakbayan sa Mandaue nagpaabot sa eskina sa Gov. Mariano Cuenco ug A.S. Fortuna sa Banilad aron pagdawat sa imahe.

Nakamugna og huot sa mga sakyanan sa dalan A.S. Fortuna pagsubay sa Traslacion paingon sa National Shrine of Saint Joseph. Si Superintendent Julian Entoma, officer-in-charge sa Mandaue City Police Office (MCPO), niingon nga gatusan ka polis ang gidestino sa gawas ug sulod sa simbahan nga giabagan sa mga barangay tanod ug mga police interns gikan sa mga unibersidad.

Samtang gihulagway sa kapolisan nga malinawon ug wala’y bisan usa ka krimen nga natala atol sa kalihukan matud sa hepe sa Police Community Relations (PCR) sa Cebu City Police Office (CCPO), Chief Insp. David Señor. Apan nabantayan ni Señor nga nikunhod og diyutay ang gidaghanon sa mga tawo nga niapil sa Walk With Mary itandi sa unang tuig nga gibanabana nga niabot sa 300 mil.

Ugma atol sa Sinulog Grand Parade, giawhag ni Señor ang katawhan ilabi na kadto’ng magdala og mga gagmay nga bata nga bantayan aron dili mawala.

Usa sa tambag ni Señor nga butangan og “name tag” ang mga bata nga dalhon sa mga ginikanan ug butangan og contact number para dali nga matawagan sa kapolisan ang pamilya sa bata nga mawala.

Sa iyang bahin, si Atty. Rey Gealon sa Cebu City Transportation Office nibutyag nga sukad sa pagbukas sa Walk With Mary hangtud sa Traslacion wala gyud sila’y natala nga insidente sa kadalanan. (Rowena D. Capistrano, Romeo T. Limpangog ug Jojo C. Ugdol/GMR)(BANAT NEWS)