Sinulog contingents gawas sa Sugbo nangabot na
CEBU, Philippines - Nangabot na ang mga out-of-town contingents nga mosalmot sa tinuig nga Sinulog Grand Parade karong Domingo.
Bisan pito lang ang apil karong tuiga, matud ni Sinulog Foundation Inc. executive director Ricky Ballesteros nga lauman sa mga manan-away ang nindot ug bongga nga selebrasyon sa pagsaulog sa Sinulog 2016.
Ang una’ng lima nga naabot mao ang gikan sa Placer, Masbate; Tangub City, Masbate City; Catbalogan City ug ang defending champion sa niagi’ng tuig gikan sa Abuyog, Leyte.
Dili mominus sa 30 ka contingents ang mosalmot sa Sinulog Grand Parade diin lakip nga moapil ang mga nakadaug sa Sinulog sa Kabataan sa Lalawigan ug Dakbayan.
Karong adlawa gikatakda nga moabot ang contingents gikan sa Lanao del Norte ug Panglao, Bohol. Samtang ang Devotees City andam na nga modawat sa mga deboto karong Biyernes.
Matud ni Cebu City acting Mayor Edgardo Labella nga ang 120 ka container vans maka-akomodar og 3,000 ka deboto nga wala’y mapuy-an sa dakbayan atol sa kapistahan ni Senior Santo Niño.
Sumala pa ni Labella nga aduna na’y nipasalig sa paghatag og kalingawan ug pagkaon sa mga deboto sulod sa tulo ka adlaw sa Devotees City. Ang Bureau of Customs nipasalig nga mohatag og usa ka gabii nga panihapon alang sa mga deboto.
Guwardiyado usab sa kapolisan ug mga barangay tanod ang lugar. (BANAT NEWS)
- Latest
