Nangreklamo kay baho ang kanal

CEBU, Philippines – Pipila ka mga residente sa Sitio Ipil-Ipil barangay Mambaling ang nagreklamo gumikan sa kabaho sa nagpundong tubig kanal sa ilang lugar ug gikahadlokan nilang magbutang kanila sa peligro gikan sa sakit.

Sa pakisusi sa Banat News sa lugar,  usa ka Nancy Cubal nga niagi sa nagpundong tubig kanal nagsuot og botas tungod kay nakaangkon na siya og pangagod sa iyang tiil gumikan sa kahugaw sa maong tubig.

Matud pa ni Cubal, taod-taod na silang nag-antos sa maong way hubashubas nga hugaw nga tubig, matud pa niya, mosamot pa gyud ilang problema kay moawas kini kun moulan ug mosulod na sa ilang panimalay nga pwerteng bahoa.

Nanawagan si Cubal sa mga hingtungdang ahensya nga mahatagan og aksyon ang kahimtang sa ilang lugar tungod kay nabalaka sila nga basin mao unya kini ang tinubdan sa sakit nga dengue.

Dugang pa ni Cubal, ang pag-usab sa  ilang drainage ug pagkagamay sa agianan sa ilang kanal maoy usa sa mga nakita nila nga hinungdan niini.

Usa ka Cleofe Molina ang mitug-an nga niduol na sila sa barangay nga ilang gipasupotan og pirma sa mga nagreklamong pamilya, sketch sa lugar ug hasta na litrato sa kanal nga nagpundo ang tubig.

Apan si Kapitan Wilfredo "Willy" Go miingon nga napahibalo na ang Department of Public Works and Services bahin niini apan giingong giuna una ang kahimtang sa mga nasunogan sa Mangga, Tugas ug Delos Reyes.

Sumala pa ni Go, karong adlawa, susihon na sa taga DPS ang maong lugar ug mopadala usab siya og sulat ngadto sa City Health Department aron masusi ang nagpundo nga tubig aron malikay sa sakit nga dengue.

Si konsehal Anne Vestil-Palomo, nibutyag nga nagpa-schedule na sila sa barangay aron pasuyopan ang maong lugar. – /EIM) (BANAT NEWS)