Palma gustong masayran ang kamatuoran sa Mamasapano
CEBU, Philippines - Suportado sa Archdiocese of Cebu ang tukoron nga “Truth Commission” nga umolon sa mga magbabalaod aron imbestigahan ang nahitabo sa 44 ka mga sakop sa PNP-Special Action Force nga namatay sa engkwentro tali sa mga sakop sa Moro Islamic Liberation Front ug Bangsamoro Islamic Freedom Fighters sa Mamasapano, Maguindanao niadtong Enero 25 karong tuiga.
Gibutyag ni Cebu Archbishop Jose Palma mahinungdanong masayran kun unsa g’yuy nahitabo.
“We have also express our agreement with the truth finding committee, para nako it’s good to know the real story behind, how did it happened, who are supposed responsible,” matud ni Palma.
Gipahibalo usab ni Palma nga atol unya sa ika-40 ka adlaw gikan sa pagkamatay sa maong mga polis molusad og prayer assembly ang simbahan sa Sugbo.
Ang coordinator sa pagahimoon nga prayer assembly nga si Father Carmelo Diola miingon nga ang tibuok Archdiocese moapil niini.
Si Palma dili usab gusto og “all out war” gumikan kay dili solusyon ang panimalos ug dili kini binuhatan sa usa ka Kristiyano. (BANAT NEWS)
- Latest
