Gipamutol nga kahoy sa USC susihon sa DENR

CEBU, Philippines - Susihon sa Department of Environment and Natural Resources-7 kung may permit ba ang gipamutol nga kahoy sa University of San Carlos-Talamban Campus alang sa ilang expansion project.

Matud sa tigpamaba sa DENR-7, Eddie Llamedo, nga atol sa ilang gihimong site inspection kauban sa mga sakop sa Environmental Management Bureau-7 niadtong adlaw'ng Biyernes, naobserbahan nga adunay mga gipamutol nga mga kahoy.

Nasayran nga ang USC nakakuha og tree cutting permit niadtong 2003 apan susihon sa DENR-7 kun nganong karon lang kini gi-implementar  samtang ang permit aduna la’y maximum period nga unom ka buwan.

Tungod niini gimando ni DENR-7 Regional Executive Director Isabelo Montejo nga moumol og grupo aron maoy mosusi sa pagpamutol sa kahoy sa nahisgutang tunghaan.

Matud ni Llamedo usa ka technical conference ang himoon sulod ning semanaha una pa sila mohukom kung ipahunong ba o pahamtangan og multa ang USC.

Si Llamedo miklaro nga tungod sa moratorium nga gipagawas alang sa tanang application sa tree cutting permit, moagi una sa ilang ulohang buhatan sa dili pa maka-isyu ang rehiyonal nga buhatan og  cutting permit. (BANAT NEWS)