Boarding house sa Canduman, balay sa Tabogon nasunog

CEBU, Philippines - Naugdaw ang pito ka balay-paabangan ug upat ka mga tindahan nga pulos ginama sa light materials dihang kalit miulbo ang kayo sa nahitabong sunog niadtong Martes sa gabii sa Canduman Housing, dakbayan sa Mandaue.

Ang sunog giingong nagsugod sa panimalay ni Lucia Sicad kinsa mao usab ang tag-iya sa naugdaw nga pito ka balay-paabangan lakip na sa mga tindahan nga nag-abang kang Sicad.

Si SFO1 Nilo Cosedo, imbestigador sa Bureau of Fire Protection (BFP) sa maong dakbayan, miingon nga nag-short circuit ang kuryente sa balay ni Sicad nga maoy nakaingon sa pag-spark hinungdan sa pagmugna sa kayo.

Matud ni Cosedo nga mitapon ang kayo ngadto sa pito ka mga balay niining paabangan sa maong lugar.

Gibanabanang moabot sa P150,000 ang gibiling danyos sa maong sunog samtang wala’y gikatahong naangol o nakalas atol sa maong hitabo.

Samtang duha usab ka balay ang naugdaw ug duha ang partially damage sa sunog nga miulbo sa Maslob, Tabogon niadtong Martes sa buntag.

Sumala pa sa kabomberohan sa dakbayan sa Bogo nga nakaresponde nga gikan sa panimalay ni Albina Densing ang sunog.

Matud ni FO1 Archie Estrella nga nahinabi sa Banat News nga usa ka heater nga nabiyaan sa sulod sa kuwarto sa pamilyang Densing ang hinungdan sa maong sunog.

Gumikan kay hinimo sa light materials, dali nga gikaon sa kayo ang maong balay ug naapil pa ang silingan. Ang balay nahimutang lang daplin sa kalsada hinungdan nga wala naglisud ang kabomberohan sa pagresponde.

Wala’y gikataho nga naangol sa maong panghitabo diin mokabat sab sa P400 mil ang gibiling danyos. (BANAT NEWS)