Bug-at nga silot sa tag-iya’g kolorum

CEBU, Philippines - Usa ka Partylist congressman misugyot nga pahamtangan og bug-at nga silot nga pagkabilanggo kadto’ng mga tawo nga mag-operate og kolorum nga mga sakyanan’g pasaheroan.

Mao kini ang unod sa balaudnon nga gisugyot ni ANGKLA partylist Congressman Jesulito Manalo ug malaumon siya nga mahimo gayud kini nga balaod.

Pagka karon, multa ra nga P5 mil ang ipahamtang sa mga masakpan nga mag-operate og kolorum nga mga sakyanan, kon mga sakyanan nga pribado apan gamiton sa pagpamasahero. Matud ni Manalo nga bisan og adunay ipahamtang nga multa sa masakpan nga mogamit pagpamasahero sa wala’y prangkisa nga sakyanan wala gayud masanta ang kolorum kay gamay ra man ang multa.

Aduna’y uban nga nag-operate og kolorum nga dili mahadlok kay dali ra nila nga mabawi ang P5 mil nga multa, ilabi na nga panagsa ra ang paghimo og operasyon sa ilegal nila nga kalihukan. Si Regional Director Ahmed Cuizon sa Land Transportation Franchising and Regulatory Board (LTFRB)-7 misuporta niini’ng sugyot ni Kongresista Manalo.

Nagtuo si Manalo nga pinaagi sa pagpahamtang og bug-at nga silot nga pagkabilanggo ngadto sa mga mag-operate og kolorum, anam-anam na nga masumpo kini’ng mao nga kalihukan.

Ubos sa House Bill 4086 kon "Anti-Colorum Act", ang tag-iya ug operator sa kolorum nga sakyanan silotan og pagkabilanggo nga prision correccional kon unom ka buwan ug usa ka adlaw ngadto sa unom ka tuig.

Ang balaudnon nagsugyot nga aduna ‘say multa nga P1 ka milyon sa pag-operate og kolorum nga bus, P200 mil kun mag-operate og Utility Van express units, P125 mil kun taxi ang i-operate ug P50 mil kun passenger jeepney.

Ang laing lagda mao nga mga lisensya sa mga tawo nga mag-drive og kolorum sakmiton ug suspensohon bali’g usa ka tuig ug rebokahon kun masakpan kini nga mohimo og subli nga kalapasan. Gisugyot usab ni Kongresista Manalo nga ang balaod magtugot nga sakmiton sa kagamhanan ang kolorum nga sakyanan.

Kun mahimo na kini nga balaod, ang mga tawo nga tag-iya sa kolorum nga sakyanan did-an na gayud nga maka-apply pa og prangkisa sa pag-operate og mga public utility vehicles. Ang ubang sakyanan nga nabutang sa prangkisa sa mao nga operator apilon sa pag-rebokar.Hinuon, daghan ang nanglantaw nga sayon ra kaayo kini himoan og paagi sa mga bilyako pinaagi sa paggamit og mga dummy nga mobarug nga maoy tag-iya sa sakyanan.

Ang balaudnon ni Manalo giduso na sa House Committee on Transportation nga gipangulohan ni Catanduanes Congressman Cesar Sarmiento aron kahimoan og pagtoon.    (BANAT NEWS)