Duha ka babaye nabiktima sa riding in tandem nga tulisan

CEBU, Philippines - Nawad-an sa iyang salapi ug mahalon nga cellphone ang usa ka babaye nga biktima sa pagpanulis sa wala hiilhing duha ka lalaki nga nagsakay og motorsiklo sa sitio Tikyan, barangay Banilad, dakbayan sa Mandaue alas 11 pasado ang takna sa miaging gabii.

Si SPO1 Renato Canja sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan miila sa biktima nga mao si Cecile Pauluana, 19, dalaga nga nagpuyo usab sa maong dapit.

Matud pa niya nga base sa giasoy sa biktima nga naglakaw kini sa maong dapit pauli sa ilang panimalay  dihang wala hiilhing lalaki nga nagsakay og motorsiklo kalit lang mihunong ug gitionan ang biktima og armas de fuego dayong deklarar nga tulis.

Dugang pa niya nga gikuha sa suspetsado ang shoulder bag sa biktima nga gisudlan sa P2,000 kapin niining kuwarta ug cellphone ug mga importanteng identification card ug mipabulhot kini sa pagpadagan pahilayo sa maong dapit. Samtang si Retchele Camindido, 35, nga taga Tres Rosas sa barangay Alang-Alang sa maong dakbayan  gilabnihan usab diha sa dalan S.B. Cabahug sa barangay Ibabao alas -11 pasado ang takna sa buntag kagahapon sa duha ka wala hiilhing lalaki nga nagsakay og motorsiklo.

Si PO2 Earl Famador sa kapolisan sa Presinto 1 sa MCPO  nagkanayon nga pulos ra hinuon identification card ug driver’s license ang sud sa bag.  (BANAT NEWS)