Tulisan patay sa pinusilay batok polis

CEBU, Philippines - Patay ang usa ka suspetsadong tulisan human kini makigpinusilay sa mga polis nga mosikop unta kaniya ug sa iyang  mga kauban didto sa sitio Mangga, barangay San Roque, dakbayan sa Talisay kagahapon  sa kaadlawon

Si Marlou Caparida, 25, residente sa maong dapit kinsa nakaangkon og mga samad pinusilan sa nagkadaiyang  bahin sa  iyang lawas, patay na kining miabot  sa Talisay City District Hospital.

Samtang ang iyang giingong kauban nga si Sulpicio Tarden Jr., 24, silingan ni Caparida, maoy  nasikop sa mga polis ug nadetiner karon sa Talisay City detention cell.

Apan ang giingong laing kauban sa mga suspetsado nga si Joel Generalao, 22, maoy  nakaikyas ug padayon pang gipangita sa kapolisan.

Sa wala pa mahitabo ang engkwentro, mga alas 3:00 sa kadlawon kagahapon si PO1 Stephen Sefuesca ug PO1 Edwin Campomanes  nagsakay sa service nga motorsiklo nga nagtangag sa plakang SG-4327  nga  misusi bahin sa report sa insidente sa kawat  sa barangay San Roque diin  nakit-an nila ang grupo  ni Caparida sa eskina sa sitio Kimba, San Roque.

Si Sefuesca ug Campomanes kinsa maoy nagmaneho sa motorsiklo misuway og duol sa grupo sa mga suspetsado apan giingong gipusil ni Caparida ang mga polis ug maayo gani wala mangaigo.

Ang duha ka mga polis misuway gihapon kini og hamag sa mga suspetsado apan giingong si Tarden mihata usab og labay sa granada ngadto sa mga polis aron dili  makaduol.

Matud ni Espina nga ang mga suspetsado dali nga  mitago didto sa balay nga gipuy-an ni Caparida.

Ang mga polis mihangyo sa asawa ni Caparida nga si Remedios  nga pasurenderon ang iyang  bana.

Apan matud ni Espina nga samtang nagsige sila og estorya sa asawa ni Caparida gipusil hinuon sila sa suspetsado hinungdan nga  nagkapinusilay   na sila ug napatay si Caparida.

Nasakmit  sa mga polis gikan  ni Caparida ang usa ka kalibre .357 revolver nga adunay upat ka buhing bala ug duha ka kabhang sa chamber niini, laing siyam ka mga buhing bala sulod sa bulsa sa suspetsado, usa ka fragmentation hand grenade, usa ka kolor puwa nga ball cap ug usa ka cellphone.

Si Espina mibutyag nga si Caparida giingong maoy lider sa grupo ug suspetsado sila sa ubang mga insidente sa tulis dili lang sa dakbayan sa Talisay, kundi  lakip na ngadto sa dakbayan sa Sugbo, Minglanilla ug dakbayan sa Naga.

Ang kapolisan sa dakbayan sa Talisay miawhag sa mga biktima sa tulis nga moadto  sa ilang buhatan aron ilhon ang suspetsadong nasikop.

Si Tarden ug ang patay’ng lawas ni Caparida ipaubos sa paraffin test ug ang pusil nga nabawi ipaubos  usab sa ballistic examination.

Si Espina midugang nga si Tarden ug Generalao pasakaan nila og kasong frustrated murder, illegal possession of explosive ug illegal possession of firearms. (BANAT NEWS)