Pagkadakop sa polis tungod sa gun ban, leksyon sa tanan–PRO7

CEBU, Philippines - Usa ka leksyon alang sa kapolisan ang pagkasikop sa usa ka intelligence officer sa Bogo Police kinsa nakuhaan og armas niadtong Domingo diha sa Argao Nature Park.

Si SPO2 Carlito Amarillo mag-atubang og kasong kriminal ug administratiba tungod sa paglapas niini sa Comelec gun ban human wala kini makapakita og gun ban exemption bisan kompleto pa sa dokumento ang iyang mga armas.

Gidili sa kapolisan nga magdala og armas nga dili magsuot og kompletong PNP uniforms.

Ang hepe sa kapolisan sa Central Visayas, Chief Supt. Marcelo Garbo Jr. mimando sa Regional Intelligence Division nga sutaon ang background ni Amarillo kun nalambigit ba usab kini og mga illegal nga kalihukan.

Matud pa ni Garbo nga ilang i-konsiderar ang pagpangayo og pasaylo ni Amarillo apan gikinahanglan usab sila nga moagi sa ensaktong proseso susama na lang sa pagpasaka og tukmang kaso batok kaniya.

Samtang ang tigpamaba sa Police Regional Office (PRO-7) Supt. Clifford Gairanod mibutyag usab nga ang pagkasikop ni Amarillo nagsilbing pasidaan ngadto sa ubang polis.

Gipasabot usab ni Gairanod nga walay bisan usa ang exempted sa Comelec gun ban bisan ang kapolisan.

Samtang ang labaw ni Amarillo nga si Sr. Insp. Rico Emperwa ang hepe sa kapolisan sa lungsod sa Boljoon mipadayag usab nga wala siya magkulang sa pagpahimangno sa iyang mga tawo kalabot sa Comelec gun ban.

Gidepensahan usab ni Emperwa nga ang iyang tawo nga si Amarillo pinaagi sa paghulagway niini nga usa ka maayong polis.

Kahinumduman nga niadtong Domingo, giingong diha sa lungsod sa Argao si Amarillo aron mamalit og kanding apan dunay residente nga nakabantay sa giluklok niyang armas ug maoy misumbong sa kapolisan hinungdan sa pagkasikop niini. (BANAT NEWS)