Paspas nga pagresponde sa alarma

Dakong kalamboan alang sa kaluwasan sa katawhan ang paghatag sa Department of the Interior and Local Government (DILG) og 45 ka bag-ong motorsiklo alang sa Cebu Police Provincial Office (CPPO) ug Cebu City Police Office (CCPO). Subay sa Unified 911 System, usang dako nga lakang kini aron mas mapatuman ang dinalian ug epektibong pagresponde sa matag alarma o tawag sa mga lungsuranon.

Dili na bag-o sa atong dunggan nga usahay magdugay ang pagresponde sa kapolisan tungod sa kahuot sa trapiko, labina sa mga pikas anggulo sa Syudad sa Sugbo ug sa mga kasikbit nga dakbayan. Pinaagi sa paggamit og motorsiklo, mas dali nga makalusot ang mga opisyal sa suok ug hagip-ot nga mga karsada aron paghatag og ntabang o pagsumpo sa krimen sulod sa pipila ra ka minuto.

Ang tumong sa DILG ubos sa pangulo ni Sec. Jonvic Remulla ug PNP Chief Gen. Jose Melencio Nartates uban sa suporta sa lokal nga panggamhanan mao ang pagtukod og kaangayan sa tubag sa matag dinalian nga panginahanglan.

Apan aron magmalamposon  ang 911 hotline sa Sugbo, kinahanglan nga dili lang ang kapolisan ang ready—dapat usab ang hapsay nga dispatch center, klarong signal sa komunikasyon, ug hapsay nga koordinasyon sa mga barangay hotline ug emergency responders.

Dako ang hagit karon sa matag police station ug presento nga makadawat sa maong mga sakyanan. Dili lang kini bahin sa pagdawat, kon dili bahin usab sa:

Hapsay nga Maintenance: Sigurohon nga kanunay nga fit for duty ang matag unit aron dili ma-stock sa estasyon kung dunay aktwal nga alarma.

Propesyonal nga Paggamit: Sigurohon nga gigamit kini sa pagpatrolya ug pagresponde sa aksidente/krimen ug dili sa personal nga katuyoan.

Ang paghatag sa kagamitan pamaagi lang sa pagpauswag sa serbisyo. Ang tunhay nga katumanan sa Unified 911magdepende sa pagkamahinatagon, kaigmat, ug dedikasyon sa matag polis nga magkupot sa matag manubela.

Angayan usab tutokan unsaon sa pagsumpo kining mga tawong walay lingaw nga magbinuang sa pagtawag sa mga presento sa kapolisan nga walay hinungdan ug makahasol kaayo sa trabaho sa atong kapolisan.

Sa mga tawo gikinahanglan seryosohon usab nato ang pagpakabana ug motabang sa mga tinugyanan sa balaod aron pabiling luwas ang atong katilingban.