Gwardiyang bana sa biktima, nasaypan ra diay

CEBU, Philippines — Gibuhian sa Lapu-Lapu  City Police Office (LCPO) ang gwardiya nga una nilang gidakop human kini maoy gitudlo sa matud pa drayber sa modern jeepney nga mao kini ang nagpatay sa iyang pasaherong babaye niadtong Disyembre 28,2024 diha sa Barangay Ibo, sa maong siyudad.

Ang maong gwardiya nga si Jelson Macmac, kanhi bana sa biktimang call center agent nga si Carmela Macmac kinsa gitusak-tusak og icepick sa usa ka wala mailhing lalaki diha sa sud sa MPUJ.

Si Police Captain Edcel Petecio, hepe  sa Public Information Office (PIO)  sa LCPO miingon nga ilahang gibuhian niadtong Disyembre 31, tulo ka adlaw human nila gidakop si Macmac human nasuta sa ilang imbestigasyon nga nasaypan kini sa drayber nga maoy nagtumbok kaniya nga maoy nagpatay sa biktima.

Ang gwardiya nga si Macmac kusganong mihimakak sa gipasangil sa drayber ug sa mga polis kay matud pa niya nag-duty siya sa usa ka pribadong eskuylahan nianang mga orasa nga gipatay ang iyang kanhi asawa.

Apan bisan sa iyang eksplinasyon, gitanggong siya sa karsel ug gibuhian lang Disyembre 31 na.

Kini human nga sa pagsusi sa kapolisan sa eskuylahan nga gibantayan niini, dunay CCTV footage nga nagpakitang naa ra sa iyang gitrabahoang pribadong eskuylahan sa Mandaue City si Macmac ug wala gyud kini mobiya sa iyang pwesto hangtud nalang nga gidakop kini sa mga polis.

Ang CCTV footage gidasonan sab ug gipamatuod sa mga kaubanan sa maong gwardiya nga wala kini mobiya sa pwestoa sa maong mga oras atol sa pagkahitabo sa krimen sa Lapu-Lapu City.

Matud pa ni Petecio sa dihang ilaha gyung gipaklaro ang dagway sa gwardiya, miangkon kini nga dili kini ang tawong nidunggab sa biktima ug gitudlo niini ang hulagway sa usa ka lalaki nga matud pa kapuyo sa biktima sulod na sa unom ka tuig human kini ug ang gwardiya nagbuwag.

Nakita sab gikan sa cellphone sa biktima ang mga mensahe nga giingong gikan sa maong kapuyo sa biktima nga nagsige kini og panghulga human sab kini gibuwagan niadtong Oktubre 2024.

Gawas sa call center agent, namatay sab anang higayon ang lady guard nga si Eva Villareal kinsa nahapla paglayat paggawas sa MPUJ dungan sa nag-stampede nga mga pasaheo. Gituohan nga giatake kini sa sakit sa kasingkasing.

Ang kanhi kapuyo sa call center mao na karon ang gitutokan pagpangita sa LCPO nga pasakaan na sab og kasong murder ug homicide.  IBM BANAT NEWS