Cebu City duha ang mayor?

CEBU, Philippines — Daghan ang nakugang sa kalit nga pagbalik ni dismissed Cebu City mayor Michael Rama sa City Hall ug nitupad kinig barog ni Mayor Raymond Alvin Garcia kauban ang ilang isi’g ka city administrators atol sa flag raising ceremony kagahapon, Disyembre 2, 2024.

Malinawon unta ang maong pagbisita ni Rama apan miulbo ang tensyon sa dihang gi-clamp ang iyang sakyanan nga naka-parking ubos sa sign “Reserved Parking for the City Mayor.”

Atol sa flag ceremony, gi-acknowledge ni Garcia ang presensya ni Rama apan gi-address niya kini nga “former Cebu City mayor” atubangan sa mga kawani nga nitambong para sa seremonya. Si Rama nakighinabi sa tanang kawani sa siyudad  ug nilakaw ra usab.

Pagkahuman sa flag ceremony, nagpahigayon og press conference si Rama sa atubangan sa Magellan’s Cross ug giinsister niini nga siya gihapon ang “elected mayor” sa dakbayan.

Sa iyang pagtambong kagahapon para kaniya niasumir na siya og balik sa katungdanan.  Kauban niini ang iyang anak nga si Atty. Mike Rama ug  Atty. Collen Rosell.

Samtang nagpahigayon og press conference si Rama, pipila ka metro lang niini gipangulohan ni Garcia ang groundbreaking ceremony alang sa instalasyon sa public Wi-Fi sa Plaza Sugbo.

Atol sa pagbisita ni Rama sa City Hall, mihapit siya sa iyang buhatan apan gikandaduhan kini, igo nalang siya nisaysay nga “I miss my office.”

Sa dihang nigawas na siya ug mosakay na sa iyang service vehicle, tensyon ang nisugat kaniya kauban sa iyang mga supporters human nga gi-clamp ang iyang sakyanan bisan pa man og naay driver sa sulod niini.

Daw nagpugong si Rama sa iyang emosyon nga gi-clamped ang iyang sakyanan dungan sa pagtudlo sa signage nga nag-ingong parkingan kini sa mayor.

Sa dihang gikuhaan sa iyang habig, si Rama miingon nga iyaha lang kini ikatawa ug iyang giawhag ang mga supporter  nga magpabiling malinawon. “We know what to do,” suma pa ni Rama.

Si Rama nisakay nalang sakyanan sa iyang anak ug nibiya palayo sa City Hall.

Si Garcia sa iyang bahin miingon nga wala siya nimando nga i-clamp ang sakyanan ni Rama, apan giklaro niya nga ang maong dapit parking area sa kasamtangan nga mayor ug dili sa kanhi mayor.

Gipasabot sab ni Garcia nga gipadlakan ang Office of the Mayor sanglit adunay hulga ang opisina nga kanhi gisulod sa tawo ni Rama. Ang maong buhatan buksan pagbalik apan magdepende sa assessment sa mga otoridad. Ang mayor nibutyag giila gihapon niya nga higala si Rama apan gikinahanglan ipatigbabaw ang lagda sa pangagamhanan. Matud pa niya, ang city hall usa ka publikong lugar ug bukas kini para sa tanan, apan dili para sa makabalda sa mga serbisyo. (BANAT NEWS)