Comelec 90 porsyento na nga andam sa eleksyon

CEBU, Philippines — Gipahibawo sa Commission on Election nga 90 porsyento na sila nga andam sa umaabot nga piniliay ug gipaabot nga makompleto na ang pag-abot sa tanang automated counting machines karong adlawa, Abril 30, 2025.

Suma ni Comelec-7 Regional Director Atty. Francisco Pobe Jr. nga nakahan-ay ug nahapsay na ang ilang pagpangandam ug masugdan dayon karong adlawa ang pag apod apod sa mga counting machines.

Giklaro ni Pobe nga dili sila mogamit og service vehicle sa mga LGUs ug sa mga barangay sa paghatud sa maong mga counting machines aron kalikayan ang mga isyu ilabi na kay dunay mga incumbent nga kandidato nga molansar.  

Dugang pa ni Pobe, ang COMELEC makig-alayon sa mga buhatan sa DENR, DPWH ug ubang mga ahensya nga dili konektado sa mga kandidato.

Sa pikas bahin, ang Department of the Interior and Local Government (DILG) niawhag sa tanang local government units (LGUs) sa paggarantiya sa patas nga pag-access sa mga pampublikong pasilidad alang sa tanan, bisan unsa pa ang political affiliation, relihiyon, o uban pang susamang konsiderasyon.

Matud sa DILG nga kini nga direktiba naglangkob sa paggamit sa mga barangay hall, multi-purpose hall, civic centers, plazas, parks, open spaces, covered courts, sports complexes, recreational centers, ug uban pang public venues.

Gipadayag sa DILG nga ang mga LGUs kinahanglang maghatag og patas nga kahigayonan sa mga political entity sa paggamit niining mga pasilidad sama sa pagpahigayon og asembliya ug mga miting, ilabina sa panahon sa eleksyon diin ang maong mga request kinahanglang hatagan og prayoridad.

Ang mga LGU mahimong magpatuman og makiangayon nga mga giya o patakaran sa paggamit niini, basta kini uyon sa kasamtangang mga lagda ug regulasyon ug ipatuman sa patas nga paagi.

Kini nga mga giya kinahanglan usab nga nagsiguro sa kaayohan sa publiko, nga nahiuyon sa kinaiyahan ug katuyoan sa paggamit sa maong mga pasilidad.

Samtang, gipadayag usab sa DILG ang kamahinungdanon sa matinud-anon nga pagdumala sa mga pampublikong kabtangan, subay sa mga prinsipyo sa patas ug tinuoray nga pagserbisyo sa katawhan. Gie-Ann N. Tapic/MEL BANAT NEWS