Cebu City Mayoral candidates misaad humanon ang CCMC
CEBU, Philippines — Gisaysay sa upat ka magpapili nga mayor sa Dakbayan sa Sugbo ang ilang tagsatagsa ka panaad kun unsaon nila paghuman ang Cebu City Medical Center kun makalingkod sa katungdanan.
Atol sa hiniusang interbyu pinaagi sa Openline kagahapon, Abril 29, 2025, ang mga kandidato nga sila si konsehal Nestor Archival, kanhi mayor Michael Rama, kanhi Commissioner Yogi Ruiz ug Julieto Co mipresentar sa ilang solusyon sa paghuman sa CCMC.
Ang CCMC mao ang usa sa labing dakong problema nga gitan-aw karon sa mga kandidato tungod kay kapin 12 ka tuig kining gitrabaho.
Gitug-an ni Archival nga moabot na ngadto P1.5 bilyon ang nagasto alang sa CCMC ug hangtud karon ang Phase 5 construction sa maong tambalanan walay plano.
“How can you finish if you have no plans? I asked them to visit my office, they visited my office yet they have not completed the plans. It’s a waste of money”, suma pa ni Archival.
Kun makalingkod isip mayor plano ni Archival nga ipaubos niya og audit ang CCMC aron nga ma-bid kini og kontraktor ug mahuman na ang ospital.
Sa bahin ni Co, siya mipasalig nga sulbaron ang paghuman sa CCMC aron mapuslan na sa publiko tungod kay nalouy siya sa mga Sugbuanon nga mapugos na lang og patambal sa mga pribadong tambalanan.
Samtang, si Rama nipasalig nga kun makabalik siya sa katungdanan makompleto na ang pagtrabaho sa CCMC sud lang sa tulo ka buwan. “It’s a globally competitive as envisioned where it becomes providing rich man services with care, compassion, and attention assured”, matud pa ni Rama.
Lahi usab ang solusyon ni Ruiz gumikan kay kinahanglan nga mag-hire og mga credible structural engineer aron masulbad ang problema sa matag andana sa ospital aron mas dali ang pagkumpleto niini.
Si Ruiz ug Rama miingon nga dili na kinahanglan nga mamasangil ni bisan kinsa pang opisyales kung nganong nalangan paghuman ang CCMC ug mas angayan nga tan-awon kun unsaon kini paghuman aron hingpit nga mapahimuslan sa mga Sugbuanon.
- Latest
