Contest alang sa Gulayan sa Barangay ibalik sa DSWD
MANILA, Philippines — Gidasig sa Department of Social Welfare and Development (DSWD) Field Office 7 – Central Visayas ang partner-beneficiaries ubos sa Pantawid Pamilyang Pilipino Program (4Ps) nga mosalmot sa contest alang sa Gulayan sa Barangay.
Una nga gipahigayon niadtong 2021 atol sa pandemic, ang contest sa Gulayan sa Barangay ibalik karong tuiga aron ilhon ang mga benepisyaryo sa 4Ps sa ilang paningkamot sa paghimo og edible garden nga naghatag og presko, organic, ug puno sa nutrisyon nga pagkaon sa ilang pamilya ug komunidad.
“We have been encouraging our 4Ps partner-beneficiaries to make their own edible garden may it be individual, communal, or school-based gardening so that they have their own source of healthy and nutritious food,” matod ni DSWD-7 Regional Director Shalaine Marie Lucero sa usa ka press release.
Ang communal garden kinahanglang atimanon sa grupo sa 4Ps family-beneficiaries sulod sa ilang barangay.
Si Lucero miingon nga ang pagbaton og gulayan naghatag og mga utanon nga nagkomplemento sa 4Ps rice subsidy. Nagpalambo usab kini sa panaghigalaay sa mga benepisyaryo ug pakigtambayayong sa mga lokal nga stakeholders nga naghatag og yuta, technical assistance, ug logistical support.
Mahimong makakuha ang mga benepisyaryo og seedlings ug technical assistance kon unsaon pagpatubo sa mga tanom gikan sa local agriculture office pinaagi sa binuwan nga Family Development Session (FDS).
Sa laing bahin, ang mechanics sa contest karong tuiga sama ra niadtong 2021 nga naglakip sa criteria nga 25% para sa Practices of Organic Culture, 25% para sa Production and Variety of Edible Crops and Vegetables, 20% para sa Creativity and Innovativeness, 15% para sa Resourcefulness ug laing 15% para sa Documentation.
Ang top three winning submissions gikan sa matag probinsiya sa Central Visayas region, nga naglakip sa Negros Oriental ug Siquijor, ilhon uban ang paghatag og cash reward ug plaque of recognition. (BANAT NEWS)
- Latest
