EDITORYAL - Wa motingog batok China

Nagkadaghan ang mga nagpangutana nganong wapa gyud kini sukad-sukad mopagawas og pamahayag pagkondenar sa mga gibuhat nga pagpanghasi sa China sa mga Pilipino diha sa West Philippine Sea si Bise Presidente Sara Duterte-Carpio.

Dunay mga magbabalaod, apil na ang usa ka magbabalaod gikan sa Mindanao ang nahibulong kun nganong nagpakahilom lang ang bise presidente mahitungod sa pagpangilog sa China sa teritoryo sa Pilipinas diha sa WPS.

Sa report sa Philstar.com, sila si Lanao del Sur ug Ako Bicol Party-list) Representative Zia Alonto Adiong  ug Jil Bongalon parehong nangutana kun nganong wala gyud mopagawas og bisan unsang pamahayag ang bise presidente may labot niini. Ning uwahi lang, subling gi-harass sa China pinaagi sa duh aka People’s Liberation Army-Air Force fighter jets ang nagpatrolyang abyon sa Philippine Air Force diha sa Bajo de Masinloc o Scarborough Shoal.  Gipatapsingan ug nagtagak og flares ang Chinese jets sa atubangan sa mga Pilipino nga gihulagway sa AFP nga peligroso, iresponsable ug gibutang sa risgo ang kinabuhi sa mga Pilipino. Ang maong insidente napuno sa taas na kaayong talaan sa pagpanghasi sa China sa mga Pilipino diha sa WPS ug ikaduha sulod lang sa tulo ka buwan nga makonsiderar nga tensyonado human sa nahitabong paghasi sa Chinese Coasgtguard sa mga sundalong Pilipino sa Ayungin shoal niadtong Hunyo 17, 2024.

Niadtong nakalabay sab nga Marso ning tuiga pugsanong gipanguha ug gisabwag sa dagat sa mga Chinese Coastguard ang mga gi-airdrop nga supply para sa mga tropa sa BRP Sierra Madre diha sa Ayungin Shoal.

Samtang gikondenar sa gobiyerno ug mga magbabalaod kauban sa katawhang Pilipino ang gipangbuhat sa China, hilom lang ang bise presidente ug ang iyang buhatan. Hinuon si Presidente Ferdinand Marcos Jr.daan ng midepensa sa bise presidente nga dili papel sa naulahi ang pagkondenar sa gihimo sa China. Mao sab kini ang depensa sa igsuon sa bise presidente nga si Rep. Paolo Duterte. Ang WPS gideklarar sa Arbitral Tribunal niadtong 2016 nga iya sa Pilipinas ug walay basihan ang pangangkon sa China.  Kun ang ordinaryong vendor sa merkado o kolektor og basura  makapadayag batok sa gihimo sa China, nganong dili man tuod kini mabuhat ang bise presidente isip usa ka Pilipino?