Unang adlaw sa bar exam hapsay ug malinawon

CEBU, Philippines — Gihulagway sa Cebu City Police Office(CCPO) nga hapsay ug malinawon ang unang adlaw sa regionalized bar examination niadtong Septiyembre 8, sa University of San Jose-Recoletos Basak Campus.

Suma ni Police Major Jeciree Basitao, Hepe sa Inayawan Police Station 10 sa Cebu City Police Office(CCPO) kinsa mao sab ang ground commander nga anaa sa 1,114 ang actual number sa examinees diin 59 ang pakyas sa pagpatim-aw atol sa eksaminasyon.

Malampuson ang ilang security coverage, wala ra sab nakasinati og kahuot sa dagan sa trapiko.

Apan ilang gilauman nga lahi ang sitwasyon karong Miyerkules, Septyembre 11, nga mao ang ikaduhang adlaw ug posibleng masinate ang kahuot sa dagan sa trapiko kay tingtrabaho ug tingklase.

Sa katapusan unya nga adlaw sa bar examination si Major Basitao miingon nga magbutang sila og dugang personnel nga langkuban sa CDM.

Gihulagway sa opisyal nga natuman ra ang liquor ban tungod kay duna sila'y mga personnel nga gipakatap uban ang BPSO sa Barangay Basak Pardo nga wala nihunong sa pagpahigayon og roving palibot sa testing center. (BANAT NEWS)