Housing project sa Mandaue prayoridad ni Bercede

CEBU, Philippines — Gihatagan karon og unang pagtagad ni acting Mandaue City mayor Glenn Bercede ang paghatag og kasiguroan sa mga molopyo sa kabarangayan nga makabaton og pinuy-anan ilabi na kadtong walay permanente nga kapuy-an.

Kini nonot sa iyang tinguha sa pagpadayon sa housing project nga gisugdan ni suspended mayor Jonas Cortes nga gitumong aron makabaton og desenteng pinuy-anan ang mga informal settlers nga nagpuyo sa mga luna nga gipanag-iya sa gobiyerno. 

Niadtong Domingo Septiyembre 15, 2024 ang 175 ka mga molopyo sa Barangay Jagobiao ang gipaubos sa orientation sa buhatan sa Urban Poor Association Incorporated o (UPAI).

Gihimo ang orientation sa tinguha nga ma-edukar ang mga informal settlers nga nagpuyo sa yuta sa goberno ug pagpasabot sa ilang mga katungod ingon man sa mga angayan nilang buhaton.

Gipasabot sa UPAI ang misyon sa ilang buhatan mao ang pag-ila sa mga Mandauehanon nga walay kaugalingong pinuy-anan.

Si Bercede miingon nga iyang ipadayon ang mga prayoridad nga programa ni Cortes nga naglakip sa paghatag og relocation site sa mga informal settlers nga dili layo sa siyudad ug makaangkon og ilang kaugalingong panimalay.

Ang mga molopyo sa Barangay Jagobiao dako og pasalamat kang Cortes kinsa ilang giila nga mayor sa katawhan.

Sa orientation nga gihimo sa UPAI, nitambong ug nipadayag sa ilang pagsuporta si City Councilor Editha Cabahug ug kanhi ABC President Ernie Manatad. (BANAT NEWS)