Pagbukas sa 32nd Cebu Press Freedom Week gisugdan

CEBU, Philippines — Mabulokon ug sadya ang pagbukas sa ika 32nd Cebu Press Freedom Week adlaw nga domingo nga gitambongan sa mga sakop sa prensa gikan sa nagkadaiyang Newspaper, TV, radio ug uban pa.

Ang maong kalihukan gisugdan sa usa ka Fun Run 2024 nga giapilan sa dili mominos 400 ka mga runners gikan sa nagkadaiyang dapit gikan sa category nga 10k, 5k, 3k ug mga sakop sa media.

Ang mga inila nga runner ang niapil sa maong fun run lakip usab ang kanhi palarong pambansa 2023 winner Asia Paraase kinsa mao usab ang nilangkat sa 10k female category.

Human sa fun run 2024 gisunod gilayon ang Santos nga misa nga gipangulohan ni Fr. Ritche Salgado, O. Carmelites kinsa kanhi nagtrabaho sa The Freeman sa wala pa kini nagpari.

Matud pa ni Salgado, atol sa pagbukas sa matag tuig nga selebrasyon sa Cebu Press Freedom Week subay sa 24th Sunday in ordinary time, nagpakita kini sa ka importante nga papel sa prensa  isip truth tellers, maoy magdala sa kamatuoran ilabi na diha sa komunidad, sa mga tigbasa ug tigpaminaw nga nag rely sa press/media nga mohatag ug Information nga mag empower, encourage ug mo participate sa pag build og gingharian sa Ginoo dinhi sa kalibutan.

Dugang pa ni Salgado atol sa misa iampo nga mahatagan og kusog ang media sa pag-atubang sa mga nagkadaiyang hagit aron magpabiling tinuoray nga channels ug true medium sa Gugma sa Ginoo para sa mga listeners ug readers.

Gisunod usab ang mga nagkadaiyang services sama sa massages wellness, check-up sa panglawas ug uban pa sa Newscoop.

Gihimo sab ang awarding para sa basketball ug volleyball tournament ug ang singing contest nga gipasadya pa gyud pinaagi sa mga cash raffles ug cellphones.

Ang mga nanambong wala man sila makadaug apan malipayon gihapon human gilingaw sila sa mga kanta gikan sa mga representante sa matag convenor ug naghimamatay usab sa uban mga kauban sa buhat.

Nangulo sa maong kalihukan mao ang The Freeman/Banat News samtang ang mga sponsors sa kalihokan kagahapon mao ang CCLEC, Smart/PLDT, ug Robinsons Galleria Cebu. (BANAT NEWS)