Pagtrabaho sa edipisyo diha sa Hipodromo mapadayon na

CEBU, Philippines — Gilibkas na sa Office of the Building Official (OBO) ang pagsuspenso sa pagtrabaho sa exterior nga bahin sa gitukod nga building diha sa barangay Hipodromo sa Dakbayan sa Sugbo.

Kini human nga nakasumiter ang kontraktor og sertipikasyon nga pinirmahan sa ilang safety officer.

Kahinumduman niadtong Agosto 26, gipahunong ang ilang pagtrabaho human nga adunay natagak nga platform gikan sa usa ka andana nga natungod gyud sa usa ka balay.

Subli nga gisusi ni Architect Florante Catalan niadtong Septiyembre 17, 2024 ang maong istruktura kun nakatuman na ba sa girekomendar sa OBO nga magbutang og safety catchers.

“Kadtong gi-request nato nga catchers in between from fifth to thirty seventh floor karon naa tay nakita. Sa among tan-aw okay-okay na,” suma pa ni Catalan.

Gibutyag ni Catalan nga nahimo ang maong pagsusi human nga nakadawat ang iyang buhatan og suwat hangyo niadtong Septiyembre 16 nga libkasun na ang pagsuspenso sa pagtrabaho sa bahin diin gikan ang natagak nga platform.

Nanghinaut si Catalan nga wala na untay mahitabo nga laing insidente sama sa mahulog nga materyales gikan sa ibabaw sa istruktura karon nga aduna nay gipangplastar nga safety catchers.

“Pwede na sila kabalik sa trabaho katong portion nga atong gi-suspend, portion ra ha. Atong giklaro nga portion ra atong gi-suspend, but the rest pwede sila katrabaho sa uban,” suma pa ni Catalan.

Sa habig sa safety officer nga si Edmund Cabahug matud pa niya nga magmatngun ug kanunay na sila nga alerto kabahin sa pagtrabaho sa maong istruktura ilabi na karon nga nagsige na og uwan-uwan dinhi sa syudad. (BANAT NEWS)