Mga biktima sa krimen giawhag nga mo report dayon sa polis

CEBU, Philippines — Nihangyo ang kapolisan sa Dakbayan sa Talisay ngadto sa mga tawo nga mabiktima sa krimen nga mosumbong dayon ngadto kanila ang panghitabo aron dali nila kini nga marespondehan.

Si Police Lieutenant Colonel Epream Paguyod, hepe sa kapolisan sa siyudad nibutyag nga makadaghang higayon na sila nakasinati nga ang mabiktima sa krimen dili dayon mo report kanila apan anha sa social media i-post ang ilang kasinatian. Usa sa mga ehimplo nga panghitabo mao ang pagkarekober sa motorsiklo sa usa ka barista gikan sa duha ka lalaki nga carnapper.

Ang biktima giingong gitionan kini og pusil ug dayon gidagit ang motorsiklo niini sa carnapper.

Ang biktima nangita sa iyang motorsiklo hangtud nga iya kining nakit-an nga gimaneho nila ni Archie Panaginit, 34-anyos nga taga San Nicolas Proper, Taboan, Dakbayan sa Sugbo ug Anthony Angana, 33-anyos, taga Alaska, Mambaling, Siyudad sa Sugbo.

Dali nga gi-report sa biktima ang panghitabo hangtud nga nadakpan ang suspetsado.

Na-recover ang motorsiklo sa biktima kinsa si Panaginit nasakmitan og kalibre .38 nga revolver nga adunay duha ka buhing bala ingon man shabu.

Samtang ang kauban niini ang nasakmitan usab og shabu. (BANAT NEWS)