Pinakadaku nga water reservoir project sa Iloilo giinagurahan

CEBU, Philippines — Giinagurahan ni President Ferdinand R. Marcos Jr. ang pinakadaku nga water reservoir project sa siyudad sa Iloilo niadtong Martes, Hulyo 16, 2024.

Ang paglusad sa water reservoir project nga pinakadako sa gawas sa Luzon, nahitabo kapin sa 40 ka tuig human makompleto ang unang yugto niini niadtong 1982, sa panahon sa amahan sa presidente, si kanhi Presidente Ferdinand E. Marcos Sr.

Ang ceremonial groundbreaking gihimo niadtong Pebrero 21, 2013 apan ang aktuwal nga pagsugod sa mga trabahong sibil, nagsugod niadtong Abril 10, 2019.

Ang mga dam sa Jalaur River Multipurpose Project Stage II (JRMP II) nagsukod og kapin sa 80 kilometros nga adunay service area nga 31,840 ka ektarya. Mokabat sa 25,000 ka mag-uuma ang gilauman nga makabenepisyo sa proyekto sa National Irrigation Administration (NIA). Si Presidente Marcos miingon nga ang JRMP II adunay tulo ka importanteng bahin ug kini mao ang irrigation development, environmental ug watershed management, ug institutional development diin ang proyekto nagkantidad og hapit P20 bilyones.

Gipadayag ni Marcos nga kini gilaumang mopausbaw sa sektor sa agrikultura ug lokal nga ekonomiya.

Tumong sa proyekto nga madugangan ang tinuig nga produksiyon sa bugas sa Rehiyon 6 og 160,000 metriko tonelada, halos 20% sa tinuig nga kinahanglanon sa rehiyon.

Usa ka bahin sa reservoir ang magsuplay sa panginahanglanon sa komersyo ug industriyal sa siyudad sa Iloilo ug makamugna ug 6.6 megawatts nga hydroelectric power para sa Isla sa Panay.

Ang umaabot nga mga plano naglakip sa inland fishery development, floating solar energy systems, ug eco-cultural tourism.

Gidayeg ni Marcos ang proyekto isip "Katuwang sa Kauswagan" o "Partner in Progress," ingon nga usa ka estratehikong pagpamuhunan sa mga kahinguhaan sa tubig ubos sa "Bagong Pilipinas" nga inisyatiba.

Ang proyekto, nga partially funded sa South Korea's Official Development Assistance, nakaabot sa 75.51% nga pagkompleto sa Hunyo 2024, nga adunay hingpit nga operasyon nga gipaabot sa katapusan sa tuig 2025. (BANAT NEWS)