P54.7M gigahin sa Kapitolyo nga premyo sa Pasigarbo sa Sugbo

CEBU, Philippines — Nikabat ngadto sa P54,705,000 ang premyo nga gigahin sa Probinsiya sa Sugbo alang sa mga mananaog sa Pasigarbo sa Sugbo 2024.

Si Gobernador Gwendolyn Garcia maoy nihatag sa tseke ngadto sa mga mayor atol sa awarding ceremony diha sa Cebu City Sports Center niadtong Agosto 26, 2024.

Ang Dagitab Festival sa Dakbayan sa Naga nakadawat og P5 milyones nga premyo isip grand champion sa ritual showdown; P4 milyones sa Sugat Kabanhawan sa Lungsod sa Minglanilla isip  2nd  place; P3 milyones sa Garbo sa Lapu-Lapu sa Dakbayan sa Lapu-Lapu; P2 milyones sa Kabkaban Festival sa Dakbayan sa Carcar ug P1 milyon sa Isda Festival sa Lungsod sa Madridejos.

Ang Panagtagbo Festival sa Dakbayan sa Mandaue ang napiling 6th place ug nakadawat kini og P900,000 nga premyo; P800,000 sa Tuba Festival sa Lungsod sa Borbon; P700,00 sa Sikoy-Sikoy Festival sa Lungsod sa San Fernando; tag P600,000 ang nagtabla nga  Rosquillos Festival sa Lungsod sa Liloan ug Hinulawan Festival sa Dakbayan sa Toledo; P500,000 sa La Torta Festival sa Lungsod sa Argao; P450,000 sa Kagasangan Festival sa Lungsod sa Moalboal; P400,000 sa Sarok Festival sa Lungsod sa Consolacion; tag P350,000 sa  Katunggan Festival sa Lungsod sa Tudela  ug Que’ Alegre Festival sa Lungsod sa  Alegria nga tabla usab sa 12th  place; P300,000 sa Banig Festival sa Lungsod sa Badian ug P250,000 ang matag usa sa Bonga Festival sa Lungsod sa Sibonga ug Tubod Festival sa Lungsod sa  Tuburan nga parehong anaa sa 15th place.

Samtang sa street dancing , ang Kabkaban Festival sa Dakbayan sa Carcar ang nakadawat og P2 milyones isip mananaog; P1.5 milyon sa  Rosquillos Festival sa Lungsod sa Liloan; P1 milyon sa Panumod Festival sa Lungsod sa Barili isip ika-tulo; P750,000 sa Sarok Festival sa Lungsod sa Consolacion; P500,00 sa  Panagbagat Festival sa Lungsod sa Poro.

Ang Sarok Festival sa Lungsod sa Consolacion maoy nakadaog isip Best Festival Jingle nakadawat sila og laing P100,000 gawas niini ang maong contingent usab ang nidaog sa Best Decorated Float hinungdan nga nahatagan usab sila og laing P1 milyon nga ganti.

Ang Isda Festival sa Lungsod sa Madridejos nakadawat og P100,000 isip Best Festival Costume; P500,000 usab ang nadawat sa Palawod Festival sa Lungsod sa Bantayan isip Best Decorated Carroza.

Samtang sa Best Decorated Float, gawas sa Consolacion nakadawat usab ang Panagsogod Festival sa Lungsod sa Sogod og P800,000 human kini napili nga 2nd  place; P600,000 ang Sinulog Festival sa Lungsod sa Carmen isip 3rd place; P400,000 ang Palawod Festival sa Isla sa Bantayan isip 4th place samtang P200,000 usab ang nadawat sa Lingaw-Sadya Festival sa Lungsod sa Balamban isip 5th place.

Ang Lungsod sa Dumanjug nga nasunogan og float nakadawat og plaque of recognition ug P200,000 nga tabang pinansiyal gikan sa Kapitolyo.

Sa Best Mayor's Introduction Video, P500,000 ang nadawat ni Madridejos Mayor Romeo Villaceran nga maoy 1st place; P400,000 kang Lapu-Lapu City Mayor Junard Chan; Santander Mayor Marites Buscato nakadawat og P300,000 isip 3rd place; P200,000 kang Samboan Mayor Emerito Calderon isip 4th place ug P100,000 kang Alegria Mayor Gilberto Magallon isip 5th place.

Ang Ako Bisaya Partylist Congressman Sonny Lagon nidugang usab og P100,000 nga cash prize sa matag mayor nga nidaog.

Sa Festival Queen competition, si Marie Yasmin Fabian sa Kabkaban Festival maoy napiling Pasigarbo sa Sugbo Festival Queen 2024 nakadawat kini og P50,000 nga premyo.

Ang first-runner up niini nga si Sofi Maxim Margareta Grenmo sa Garbo sa Lapu-Lapu nakadawat og P30,000; ang second runner up nga si Kyra Rei Hopkins sa Sugat Kabanhawan Festival nakadawat og P20,000 nga premyo samtang P15,000 usab ang kang  Britanny Noynay Verleysen sa La Torta Festival sa Arga  isip third runner up ug si  Qatari Semblante sa Rosquillos Festival ang nakadawat og  P10,000 nga premyo.

Ang napiling Miss Photogenic mao si Mary Love Lopez sa Panagbagat Festival nakadawat og P10,000 samtang P20,000 ang alang sa designer nga si Eden Grace Mendez sa Sinulog Festival human napili nga Best Festival Queen Costume.

Nunot niini, si Talisay City Mayor Gerald Anthony “Samsam” Gullas, Jr. mapasigarbohon gihapon sa Halad Inasal contingent bisan og wala kini makadaog Pasigarbo sa Sugbo 2024.

Si Gullas nakigkita sa contingent ug nihatag sa allowance sa mga kabataan.

Matud ni Gullas nga ang ilang pagpresentar sa siyudad usa na ka matang sa kalamposan. (BANAT NEWS)