5,160 ka mga nalambigit og drugas nakakompleto sa rehab

CEBU, Philippines — Gitaho sa Cebu City Office for Substance Abuse Prevention (COSAP) nga 5,160 ka mga identified drug personalities nga lakip sa watchlist sa syudad ang naka-kumpleto na sa unom ka buwan nga Community Based Drug Rehabilitation Program.

Suma pa ni COSAP Executive Director Jonah John Rodriguez nga ang maong numero katunga kini sa 10,701 drug personalities nga lakip sa watch list sa police ug Philippine Drug Enforcement Agency (PDEA) nga gikan sa 80 ka mga barangay nga natala sukad pa niadtong Disyembre 2023.

Dugang pa ni Rodriguez padayon gihapon ang COSAP sa pagkumbinser sa ubang mga drug users nga mo-avail sa CBDRP. “Sa atong fight against substance abuse, kailangan wala gyuy mahabilin. No one should be left behind”, suma pa ni Rodriguez atol sa COSAP Moagak: Gugma Dili Droga teleradyo program sa Sugboanon Channel.

Hinuon dunay tahu nga nadawat ang COSAP adunay mga nibalik na sab sa maong bisyo human nga mi-gradwar sa maong programa.

“Naa gyud tay instances nga atong mga clients mo-lapse o’ mo-relapse but that is part of the rehabilitation cycle,” suma pa ni Rodriguez.

Gitug-an usab ni Rodriguez nga dunay mga barangay nga nipatuman og mga programa alang sa pagtabang og recover sa mga drug users sama sa pag-enrol kanila sa Tulong Panghanapbuhay sa Ating Disadvantaged/Displaced Workers (TUPAD) ug sa Tabang Alang sa Panginabuhian sa Atong mga Trabahante (TAPAT).

Plano sab ni Rodriguez nga kumbinsihon ang konseho sa dakbayan nga mogahin og P3 milyones nga pundo alang sa programa nga motabang sa mga tiggamitan og droga kaniadto nga makasulod sa mga pribadong kompaniya.

“Mao nang emotional gyud ko basta makadungog ko sa ilang kaagi kay grabe ang among challenge sa pagpasabot nila nga moapil sa atong programa,” saysay pa ni Rodriguez. (BANAT NEWS)