10-anyos nalumos

CEBU, Philippines — Napalgan nga wala nay kinabuhi ang usa ka 10-anyos nga batang lalake human gituohang nalumos sa kadagatan sa Barangay El Pardo, Lungsod sa Boljoon, Lunes sa buntag, Agosto 26, 2024.

Ang bata tinun-an sa Grade IV ug residente ra usab sa maong barangay. Sa imbestigasyon sa Boljoon Police Station nga alas-8 sa buntag niadtong adlaw'ng Lunes, Agosto 26, 2024 ang bata uban ang maguwang niini nga 15-anyos nga lalake ug duha ka mga uyoan nga sila si Angelito ug Emilio Sestoso nag-uban sa dagat aron mamana ug mamukot.

Apan dangtang pila ka oras nakamatikod ang maguwang nga wala na niini igkita ang manghod ug bisan giunsa nila og sangpit ug pangita sa palibot wala gyud kini nila makita.

Tungod niini, nagpatabang sila sa mga sakop sa Municipal Disaster Risk Reduction and Management Office sa lungsod alang sa search operation.

Pasado alas 5 na sa hapon nakit-an ang bata nga naglutaw sa dagat diin sila namukot ug namana, gituohang nalumos kini. Gidala pa nila ang biktima sa Oslon District Hospital apan gideklarar kining dead-on-arrival. (BANAT NEWS)