Konseho sa SK sa Cebu City hatagan og tag P1M

CEBU, Philippines — Ang kagamhanan sa Dakbayan sa Sugbo gikatakdang manghatag og tag P1 milyon nga ayuda ngadto sa matag konseho sa Sangguniang Kabataan (SK) sa tanang 80 ka barangay sa Dakbayan sunod semana, Miyerkules, Hulyo 17, 2024.

Gianunsiyo ni Acting Cebu City Mayor Raymond Alvin Garcia niadtong Hulyo 13, 2024 nga sa sunod semana na kini madawat sa mga SK igo usab mahuman ang Palarong Pambansa aron makapahigayon sila sa ilang summer league alang sa mga kabatan-onan.

Kini gipahibalo atol sa pagbansay sa opisyales sa SK kabahin sa Media and Information Literacy (MIL) Toolkit nga gipahigayon diha sa barangy hall sa Duljo Fatima.

Si Garcia nagkanayon nga daghan kaayo ang niduol kaniya nga nangayo og tabang alang sa ilang mga liga nga giingong ilahang i-charge sa city-sponsored account sa kagamhanan sa siyudad.

Apan matud ni Garcia nga dili na kini angayang huna-hunaon pa nila tungod kay iyaha nang i-release ang ilang tag P1 milyon diin ang maong pundo nga ipanghatag maggikan sa general fund.

Kanunay usab niyang gipahinumdoman ang mga SK nga sa bisan gamay nga paagi sila motampo sa kaayohan sa ilang dakbayan.

Sa laing bahin, tuyong gitambongan ni Garcia ang gipahigayon sa Sangguniang Kabataan Federation nga training kabahin sa MIL Toolkit alang sa mga batan-ong lider sa dakbayan.

Gipadayag ni Garcia nga mahinungdanon ang maong training tungod kay maghatag kini og kaalam sa mga kabatan-onan ilabi na karong panahona diin nag-unang tinubdan sa impormasyon ang internet ug social media. (BANAT NEWS)