Babayeng tigpautang gipatay
CEBU, Philippines — Patay ang usa ka babaye human kini gipusil makadaghang higayon sa nag-inusarang mamumuno diha sa Sitio Lower Kawayan, Barangay Sambag 2, Siyudad sa Sugbo kagahapon pasado alas 12 , adlaw'ng Domingo, Hulyo 14, 2024.
Ang biktima mao si Jessica Ansag Sumbala, 37, residente sa naasoy nga dapit. Nagkanayon si Police Captain Mark Eric Papong, hepe sa Abellana Police Station 2 sa Cebu City Police Office(CCPO) ngagikan sa pundok sa mga higalang nag-inom duol sa basketball court ang biktima ug padung na kini pauli.
Apan dihang duol na kini sa ilang balay kalit kining gisugat sa mamumuno nga nag-atang nang daan sa iyang agianan. Ang mamumuno nagsul-ob og itom nga jacket nga naay hood.
Nasayran nga drug surrenderee niadtong 2018 ang biktima ug nagpautang sab kini matud pa og kwarta.
Gisubay sa kapulisan kung personal grudge o may kalambigitan ba sa illegal nga drugas ang motibo sa krimen.
"Usa pud na sa among gitan-aw basin involvement sa drugs or ang information pud among na receive nagpautang siya diha," matud ni Papong.
Ang biktima unang gipusil dapit sa balay niini ug nakadagan apan gigukod kini ug giusban pagpusil kaupat ka higayon nga miresulta sa iyang hinanaling kamatayon.
Padayon pa ang imbestigasyon sa kapulisan sa maong pagpamusil. (BANAT NEWS)
- Latest
