Duha taxi nag-overpricing

CEBU, Philippines — Gipasalig ni acting Cebu City Mayor Raymond Garcia nga seryuso ang siyudad sa pag-aksyon batok sa mga drayber og taksi nga nag overpricing  sa pletihan sa mga delegado sa Palarong Pambansa human dunay duha ang nadakpan sa entrapment operation.

Matud pa adunay mga nanggawas nga reklamong nag-overpricing karon ang mga taxi drivers ug dili mogamit sa ilang metrohan.

Si Garcia niawhag sa Land Transportation Office (LTO)-7 nga susihon ang maong mga reklamo.

Tungod niini, aduna dayuy gilusad nga entrapment operation si LTO-7 Regional Director Glen Galario kagahapon, adlaw nga Huwebes, Hulyo 17, 2024.

Matud pa usa sa mga taxi drivers nangayo og P2,509 nga pleti gikan sa SM Seaside padung sa Carcar City, samtang ang usa nangayo sab og P950 gikan sa pier area padung sa Danao City.

Matud pa niya, seryuso siyang putlon kini nga binuhatan sa mga drayber aron mahunong na kini.

Tungod niini, gimando ni Garcia sa CCTO nga makigalayon sa mga LTO enforcers aron masanta ug dili na kini mausab.

“I am happy right after I talk to them nga naa gyud silay nadakpan unya aka sila giingnan nga ipadayon ning inyo operations up until mahuman and Palaro,” matud pang Garcia.

Si Garcia nidugang nga dili niya gustong maguba ang imahe sa siyudad aning pagpahigayon dinhi sa Palarong Pambansa 2024 tungod aning mga tikasan nga drayber.

Iyaha hinuong giawhag ang mga taxi drivers nga mohatag og diskwento sa palaro athletes inay nga maningil og sobra.

“Mao na ako giingon, we have to treat visitors right, treat utmost respect kay gusto man ta og mubalik sila diri that they will enjoy stay in Cebu,” dugang pang Garcia.

Nagpasalamat hinuon si Garcia sa mga taxi drivers nga nisunod sa balaod ug mga regulasyon kay sila nakatabang sa maayong pagtan-aw sa mga bisita sa Sugbu.

“Naa lang gyud tay few rotten eggs diha nag angay na gyud silutan, ang sanction-nan, og hatagan og penalty,” dugang pa sa mayor.

Sa gipagawas nga pamahayag sa LTO-7 ang mga driver nga mapamatud-ang nag overcharging pamultahon og P5,000 sa unang higayon, P10,000 kun segundahan ug P15,000 sa ikatulong higayon ug pag-revoke sa lisensiya kun mousab.

Si Galario miingon nga dili nila palabyon ang maong reklamo ug mimando paglusad og random operations sa mga taxi drivers ug silutan dayun kadtong mamatud-ang nakalapas.

Gidasig sab niya ang mga pasahero nga nabiktima nga mo-file og reklamo sa ilang opisina ug sa LTFRB. Kinahanglan kuhaan og hulagway o video ang drayber, plaka, body number, oras ug petsa ug ang lokasyon aron ipakita atol sa husay diha sa LTO.

Ang publiko giawhag nga mahimo silang motawag sa LTO 7’s hotline 0962-446-0435 aron mosumbong. (BANAT NEWS)