Kalidad sa hangin sa CV wa ra maapektahi pagbuto sa Kanlaon

CEBU, Philippines — Walay angay ikabalaka ang publiko nunot sa pagbuto sa bulkang Kanlaon didto sa isla sa Negros kun ang hisgutan mao ang polusyong dala sa gibugwak niining bagang aso, abo ug asupre sa kahanginan.

Sumala pa sa Environmental Management Bureau sa Department of Environment and Natural Resources-7 , basi sa pag-monitor sa kalidad sa hangin niadtong Hunyo 8,2024, ang Air Quality Status sa mga piniling dapit sa Central Visayas nagpakita nga maayo ra kini.

Gawas nga maayo ug limpyo ra ang kalidad sa hangin, luwas sab kini para sa mga tawo sumala pa sa ilang post sa ilang Facebook page.

Apan mipasidaan ang EMB-Visayas sa publiko nga kanunay nga mosusi sa mga advisories nga gi-post sa PHIVOLCS kabahin aning volcanic sulfur dioxide (SO2) gas emissions o asupre.

Kini human nga ang EMB-Visayas miingon nga duna silay na-monitor nga PM10 ug PM2.5 nga presensya niini sa kahanginan.

Ang PM10 m pino kaayo kini nga abog nga duna ray gidak-ong 10 micrometers (0.01 mm) o mas gamay pa sa PM2.5 particles o 2.5 micrometers in diameter.

Ang Central Visayas Air Quality nga gibasihan nianang adlaw Hunyo 8, 2024 nagagikan kini sa monitoring stations sa Masulog, Canlaon City sa alas 7 sa buntag diin  dunay namatikdang PM10 nga 12 gikonsiderar pa gihapong “good; Toledo City Cebu sa alas 8am, PM10 nga 12 ug PM2.5 nga 5  gikosiderar gihapong good; ug sa Mandaue City sa alas 8 sa buntag nga,PM2.5 nga 35 nga gikonsiderar pa gihapong good.

Ang Department of Science and Technology, Philippine Institute of Volcanology and Seismology Phivolcs, miingon nga dunay natala nga 17 ka volcanic earthquakes sa palibot sa Mt. Canlaon kagahapon, Hunyo 9,2024.

Ang maong bulkan sukad sa pagbuto niini nagbuga og 4,397 toneladang sulfur dioxide kada adlaw.

Subling gipasidan-an ang tanan nga peligro pa gihapon ang mopaduol sud sa upat ka kilometro gikan sa baba sa maong bulkan nga gikonsiderar na nga permanent danger zone ug no fly zone sa tanang matang sa abyon. Ang mga apektadong mga residente sa Barangay Linuthangan sa Canlaon City nakadawat na og family food packs gikan sa Department of Social Welfare and Development-7 kagahapon. — /IBM (BANAT NEWS)