P2.2 milyong shabu nasakmit sa buybust operation

CEBU, Philippines — Nakompiskar sa kapulisan sa Lungsod sa Panglao, Probinsya sa Bohol ang P2.2 million nga balor sa illegal nga drugas atol sa ilang buy-bust operation sa Purok 6, Barangay Poblacion, Panglao, Bohol sa miaging adlaw.  Nadakpan sa kapolisan sa Panglao ang 47-anyos nga giingong big time drug  pusher nga taga Tagbilaran City ug nakuhaan kini og 325 gramos nga gituohang shabu nga nagkantidad og P2.2 milyones ug mga drug paraphernalia.

Ang suspetsado kasamtangan karon nga naa sa kustodiya sa kapulisan ug ang mga nakompiskar nga drugas gitugyan na sa Bohol Provincial Forensic Unit for examination.

Si Police Regional Office(PRO)-7 Director Brigadier Anthony Aberin  nagkanayon nga ang PRO-7 midoble sa ilang kampanya aron masumpo ang illegal nga drugas sa Central Visayas.  "This success demonstrates the diligence and collaborative spirit of our personnel in the fight against illegal drugs. The positive results of our efforts underscore the importance of maintaining a drug-free community where everyone can live in peace and safety," sigon ni Aberin.

Ang suspetsado mag-atubang og kasong kalapasan sa Republic Act 9165 kun  Comprehensive Dangerous Drugs Act of 2002.

Tulo ka mga tawo ang nadakpan sa kapulisan sa Waterfront Police Station ug Pari-an Police Station atol sa managlahi nga buy-bust operation sa siyudad sa Sugbo kagahapon sa kaadlawon.  Unang nadakpan sa Pari-an Police Station diha sa Sitio BSJCO, Barangay T. Padilla si Lyle Matañoza, 33, residente sa Sitio Caimito, 831 Tres de Abril Street, Barangay Labangon ning siyudad.

Ang suspetsado nakuhaan og 10 gramos sa gituohang shabu nga nagkantidad og P68,000 ug drug paraphernalia.  Samtang nadakpan sab sa kapulisan sa Waterfront Police Station 3 si Michael Olivar Vasquez alyas Baki, 44, nagpuyo sa Sitio Silangan 1, Barangay Tinago.  Nakompiskar gikan sa dinakpan ang 10.5 grams nga shabu nga mobalor og P71,400.

Sunod nilang nadakpan ang igsuon niini nga si Evmar Vaquez alyas Emay, 36, nga residente gihapon sa Sitio Silangan 1, Barangay Tinago ug nakuhaan sab kini og 10 gramos nga gituohang shabu.  Ang mga suspetsado nagtingkagol karon sa Prisuhan ug gikatakda nga pasakaan og kasong kalapasan sa Section 5 ug 11, Article II sa Republic Act 9165. IBM BANAT NEWS