BFP: Fire Prevention Month sugdan karon, pagmatngon batok sunog

CEBU, Philippines — Sa buwan palang sa Enero ug Pebrero tuig 2024 ang Cebu City Fire Station nakatala na og 64 ka sunog sa siyudad sa Sugbo, mas daghan kini itandi sa kaparehas nga buwan sa miaging tuig nga naa lang sa 35 ka sunog.

Sa pagsugod sa Fire Prevention Month sa buwan Marso ning tuiga usa gyud sa gihatagan og pagtagad sa kabomberohan nga mamenusan ug malikayan ang mga sunog nga mahitabo sa dakbayan.

Kini pinaagi sa pagpahinumdom sa publiko sa mga angayang buhaton ug angayang timan-an aron malikayan ug maluwas kun dunay sunog nga moulbo.

Si Senior Fire Officer 2 Wendell Villanueva, tigpamaba sa Cebu City Fire Station uban sa publiko ang kabomberohan sa kanunay’ng panahon sa paglikay sa sunog. Ang tema karong tuiga "Sa pag-iwas sa sunog, hindi ka nag-iisa."

Gitug-an sab ni Villanueva nga ang nag-unang hinungdan sa sunog kay kining electrical misuse, overloading, mga nalaksi nga wire ug mga substandard nga mga appliances.

“From time to time atong i-revisit ang atoang mga eletrical installation sa mga panimalay unya kaning neglect pahimangno nato sa publiko nga dili mag overnight charging, atong i-discourage na siya unya ayaw gamit aning de kuryente nga appliances nga mga substandard kaayo,” sigon ni Villanueva.

Nasayran kagahapon sa buntag nag motorkada ang kabomberohan sa Cebu City Fire Station gikan sa South Road Properties agi sa mga Barangay sa South ug North District.

Nag-abot sila sa  Pahina Central Fire Station diin usa ka mubong programa ang gipahigayon ug ang dinapit nila nga bisita kay si Cebu City Councilor Phillip Zafra kinsa miingon nga importante ang kasayuran sa paglikay sa sunog.

Human sa programa gipakita sab sa Cebu City Fire Station ang katakos nila sa pagresponde sa sunog ug pagluwas sa mga biktima nila diin mga kababayen-an ang naghimo niini isip pag-ila sab nila subay na sa National Women’s Month Celebration.

Samang nipahinumdum sab ang City Fire Marshal sa Dakbayan sa Mandaue Supt. Arnel Abella sa katawhan nga mag-amping pirmi sa ilang mga panimalay aron makalikay sa sunog.

Matud pa ni Abella, angayan susihon tanan sa tagbalay ang ilang mga panimalay aron makalikay sa sunog.

Aduna silay daghan mga nakalinya nga kalihukan sa Fire Prevention Month, diin aduna silay open house sa ilang fire station, community outreach, poster making contest ug uban pa.

Dugang pa ni Abella, magpadayon gihapon usab ang ilang naandan nga kalihukan sama sa roving ug fire truck visibility sa maong dapit.

Gibutyag ni Abella, base sa ilang talaan adunay walo ka sunog ang natala sa Enero ngadto sa Pebrero sa 2023  ikomparar sa susama nga buwan sa 2024 nga aduna lay pito.

Sa nilabay na tuig sa susama nga buwan enero to February adunay dili mominos sa P180 mil lang ang danyos diin mas taas karon tuiga sa susama nga buwan diin niabot ngadto sa dul-an P1.8 milyon diin pasabot pa ni Abella mas dagko og danyos ang mga residential houses.— Romeo T. Limpangog ug Gabriel Bonjoc, IBM BANAT NEWS