Dakbayan sa Sugbo andam na sa Palarong Pambansa

CEBU, Philippines — Gipasalig sa dakbayan sa Sugbo nga maoy mo host sa Palarong Pambansa 2024 nga mahimong andam na ang venue sa palaro sa dili pa ang pagpahigayon niini nga gitakda karong Hulyo 9 ngadto16.

Nasayran gikan kang DepEd’s assistant schools’ division superintendent Adolf Aguilar nga hingpit na nga nadesisyonan ang petsa sa pagpahigayon sa Palaro dinhi sa dakbayan sa Sugbo.

Sa dili pa ang pagbukas niini adunay mga kalihuhan nga nakahan-ay na.

Gipaabot ang pag-abot sa mga delegado karong Hulyo 6-7 ug sa Hulyo 7-8 adunay solidarity meeting sa mga delegasyon ug Refresher course alang sa technical officials.

Sa Hulyo 9 mao na ang gikatakda nga grand opening diha sa Cebu City Sports Center samtang ang closing ceremonies gikatakda karong Hulyo 16 diha sa South Road Properties.

Ang Hulyo 10 gitagana alang special events ug magsilbi usab nga rest day sa mga atleta sa dili pa ang competition proper nga mahitabo gikan sa Hulyo 11 gnadto sa 15 sa nagkalain-laing areas dinhi sa dakbayan.

Ang mga venues apil na ang CCSC gipaniguro nga mahimong andam na sa dili pa ang buwan sa Mayor tungod kay gamiton man usab kini alang sa pag host usab sa siyudad sa Central Visayas Regional Athletic Association (CVIRAA) Regional Meet.

Si Jovito Taborada CCSC manager mitug-an sa The Freeman nga sa pagkakaron naan a sa 70 porsyento nga nahuman ang pag-ayo niini.

“Right now, naa na tas 70%...Nag asphalting na man sila (oval)..Human ani, to follow na ang rubber,” suma ni Taborada.

Samtang alang sa billeting quarters, gipa-andam na usab ang mga tunghaan nga maoy estaran sa mga atleta. Gikan sa The Freeman, MEL BANAT NEWS