VP Duterte kopyahon ang feeding program sa probinsya
CEBU, Philippines — Nagplano si Vice President ug Education Secretary Sara Duterte nga ilang kopyahon ang feeding program nga gipasiugdahan sa Cebu Provincial government sa mga publikong tunghaan alang usab sa ubang public schools lukop nasud.
Kini ang gipadayag ni Duterte atol sa iyang pagbisita dinhi sa Sugbo niadtong Biyernes diin suma pa niya nga ilang gimonitor ang maong programa sa Probinsiya sa Sugbo aron ila usab kini nga buhaton sa ubang publikong tunghaan sa tibuok nasud.
Kahinumduman niadtong Nobiyembre 2023 gigahinan sa probinsiya sa Sugbo pinaagi ni Governor Gwendolyn Garcia og mokabat sa P197 Million isip initial budget ang programa.
Ang feeding program gihimo sa mga tunghaan sa probinsiya matag Lunes ngadto sa Biyernes ug mahuman hangtud matapos ang school year.
Niabag sa paglihok niini mao ang mga miyembro ug mga opisyales sa Parent-Teacher Association sa matag tunghaan.
“Ginatan-aw ni namo nga model gyud para sa ubang mga local government units. We are closely watching how Governor Garcia is doing it,” suma pa ni VP Sara Duterte.
Gipasalamatan usab sa bise presidente ang pribadong sektor nga mihatag og suporta sa Cebu Province alang sa feeding program.
Nanghinaut si VP Sara nga ang maong programa makatabang sa mga tinun-an sa ilang maayong performance sa eskwelahan.
Samtang gikalipay usab ni Governor Garcia ang maong pamahayag sa bise presidente.
“I’m very happy to hear that, in fact one of the items we were talking about because she has heard of it, and she has seen program is really helping our children in their capacity to comprehend… Comprehension sa mga gitudlo” suma pa ni Garcia.
Gipadayag sa gobernador nga importante kaayo nga mapakaon og insakto ang kabataan aron maka-focus kini sa ilang mga leksyon. Gidayeg usab ni Gov.Garcia ang paningkamot sa PTA ug sa pribadong sector nga niabag sa programa.
“Ang nakanindot kay nagtinabangay ang tanan, tabang ang mga ginikanan, PTA…Karon ni tabang ang San Miguel, ug ang Purefoods,” suma ni Garcia. — /MEL (BANAT NEWS)
- Latest
