P35k nga bonus sa mga kawani sa city hall hayan mahatag-CTO

CEBU, Philippines — Nunot sa giingong ka walay kasiguruhan sa P35k nga bonus sa mga empleyado sa city hall, ang City Treasurer's Office (CTO) ni-assess nga ang kinatibuk-ang kantidad mahimo bisan pa nga wala makaabot sa target collection nga P50 bilyones alang sa tuig 2023. Niadtong Martes, Disyembre 5, 2023, usa ka special budget hearing ang gipahigayon diin ang executive department nakapresentar sa tinubdan sa pundo alang sa gisugyot nga P35,000 nga bonus alang sa mga regular ug kaswal nga mga empleyado ug ang proposed ordinance nga magpaluyo sa paghatag ug bonus sa job order nga mga empleyado.

Personal nga gi-assess ni Mare Var Reyes, Cebu City Treasurer nga ang budget hearing nakakuha og positibong feedback gikan sa konseho.  “Actually I gave the assurance na if ma deliberate lang nila on the 13th (of December), the executive will do its part na ma release jud sya before Christmas,” sigun ni Reyes. Hinuon, si Reyes miingon nga si konsehal Noel Wenceslao ang chairman sa Committee on Budget Finance misugyot nga dili lang usa ibutang ang kantidad kung musugod na sa ilang pag-andam sa payroll tungod kay ang eksaktong kantidad kinahanglan pa nga ipaubos sa deliberasyon karong Disyembre 13, 2023, atol sa regular nga sesyon.

Mahitungod sa tinubdan sa pundo, matud ni Reyes nga ang mga bonus dili dugang nga pundo kon dili ang kantidad nga natigom gikan sa mga Personal Services.

Hinuon, giangkon niya nga kini bisan pa sa wala makab-ot ang target nga koleksyon nga P50 bilyon alang sa 2023. Ang giaprobahan nga budget alang sa 2023 mao ang P50 bilyon diin sa pagkakaron bulan sa Disyembre, P8 bilyon nga koleksyon pa lang ang nakab-ot.

Lakip sa mga hinungdan nga wala matuman ang target collection mao ang pending approval sa proposed ordinance nga nagbag-o sa Real Property Tax (RPT) rates sa siyudad. — /MEL (BANAT NEWS)