Nagdanga-dangang bagyo gipangandaman

CEBU, Philippines —  Gipangandaman sa kagamhanan sa Dakbayan sa Sugbo ug Talisay City uban sa mga line agencies kining nagdanga-danga nga bagyo kay matud pa mas maayong over-prepared nungka maunhan sa katalagman.

Dul-an sa 400 kapin ka mga rescue personnel ug mga kagamitan ang gi-andam sa Cebu City para sa pagpangandam sa mahimong epekto sa nagdanga-danga nga bagyo.

Ang mga kahimanang giandam naglakip sa mga ambulansya, mga fire trucks nga gamiton usab sa mga rescue vehicle, dump truck ug anaay mga generator sets aron sa pagseguro nga adunay magamit kung ugaling maputol ang power supply.

Usa ka hamubo nga programa ang gipahigayon nga gipangulohan ni Cebu City Acting Mayor Raymond Alvin Garcia, diin gibutyag niini mas maayong over prepared ang siyudad bisan na downgrade ang weather disturbance ngadto nalang sa low pressure area.

Matud pa ni Harold Alcontin ang pangulo sa CDRRMO nga wala pa sila modeklarar og alert status tungod kay nagpaabot pa man sila sa update sa PAGASA sa mosunod nga 24- oras.

Ang chairman sa DRRMO sa konseho sa Dakbayan sa Sugbo, Joel Garganera, nitug-an nga suportado nila sa konseho ang mga kalihukan sa CDRRMO aron dili masubli ang nahitabo sa nilabay nga katalagman sama sa bagyo nga Odette.

Sa pikas bahin, si  Talisay City acting mayor Eduardo “Digul” Gullas III  mialerto na sa Talisay City Disaster Council sa nagdanga-danga nga bagyo.

Si Gullas nipatawag ni Alvin Santillana, pangu sa City Disaster Risk Reduction and Management Office (CDRRMO) aron andamon ang ilang gikinahanglan kun aduna man gyud kusog nga hangin og pag uwan.

Lakip nga nitambong ang taga Department of Interior and Local Government (DILG), kapolisan, kabumberohan ug Talisay City DEPED apil na sab ang kabarangayan.

Samtang si Santillana nitataw nga ilang pakigtagbuon ang mga kapitan ilabi na kadtong bag-o nakadaog aron pahibaw-on sa sistema sa ilang koordinasyon.

Gisugdan na sab ang pagpamutol ang mga kahoy nga peligro sa Talisaynon sa mga sakop sa Aksyon Agad Team pinangulohan ni Gary Togonon sugod pa niadtong miaging semana. Sagad sa gipamutol mao ang mga kahoy duol sa kabalayan ug tunghaan.

Matud pa niya nga natagam na sila sa nangaging mga bagyo  nga daghan ang natumbahan sa mga kahoy. — Gabriel Bonjoc, IBM (BANATNEWS)