Duha ka eskwelahan sa CV nipatuman sa laing pamaagi sa pagtudlo

CEBU, Philippines — Aduna nay duha ka tunghaan sa Central Visayas ang nipahimulos sa gipagawas nga bag-ong memorandum sa Department of Education sa kaulohan nga makahimo ang mga tulonghaan nga mosuspenso sa ilang face to face nga klase ug mogamit ug lain nga mga pamaagi tungod sa nasinati nga grabeng kainit sa panahon.

Kini ang gibutyag ni Dr. Salustiano Jimenez, direktor sa DepEd Central-7.

Ang maong mga tunghaan gikan kini sa Tanjay City sa Negros Oriental kinsa nipatuman na karon og mga alternatibo nga pamaagi sa pagpahigayon sa ilang klase gikan sa kasamtangang face to face.

Si Jimenez nagkanayon nga mas gilantaw karon sa mga nagdumala sa mga tunghaan nga dili lang ang kaluwasan sa mga tinun-an diha sulod sa tunghaan apan lakip na usab ang pag-uli ug pagbalik nila sa ilang mga eskwelahan tungod kay kasagaran sa mga kabataan ang maglakaw ilabi na panahon sa pagpaniudto.

Gibutyag ni Jimenez nga atol unya sa ilang Regional Management Meeting karong Sabado usa sa ilang mga agenda nga tukion mao ang pamaagi sa pagdumala sa maong sitwasyon.

Gawas sa duha ka tunghaan sa Negros Oriental wala pa’y laing eskwelahan nga nipadangat sa ilang pagsuspenso sa face to face nga klase.

Gipahimangnoan ni Jimenez ang mga kadagkoan sa tunghaan nga dili magduha-duha sa pagsuspenso sa ilang mga klase ug mogamit lang ug lain nga mga pamaagi sa pagtudlo ilabi na nga mas masinati pa ang kainit sa panahon sa nagsingabot pa nga mga adlaw. (BANAT NEWS)