Kapolisan mohatag seguridad panahon sa kampanya

CEBU, Philippines – Mga kaalyado man sa administrasyon o dili, hatagan gihapon sa kapolisan og seguridad ang mga politiko panahon sa ilang pangampanya.

Gitin-aw sa direktor sa Police Regional Office-7 nga si Police Chief Superintendent Debold Sinas nga alang sa umaabot nga campaign period sa lokal nga mga kandidato karong Marso 29, ang lugar nga himuan og campaign rally, maoy ilang bantayan ug dili ang mga kandidato mismo.

Matud niini nga ang mga tawo nga mosalmot maoy ilang prayoridad ug dili ang mga politiko.

“We have directed our major cities nga pag naay kampanya, except lang sa close-in security, kay ginadili. Pero kung nay rally or convergence sa mga tao, kinahanglang i-secure. Mao toy guidance ni Chief PNP nga dili mamili ang polis kung kinsa ang hatagan og security coverage during rallies and convergence of people,” sigon ni Sinas.

Ang tigpamaba sa Cebu Provincial Police Office nga si Police Superintendent Eloveo Marquez miingon nga sa pagkakaron, wala pa hinuon silay gipamalhin nga mga polis nunot sa koneksyon sa kandidato.

“Kung ang place of assignment naa sad didto ilahang paryente nga modagan, ibalhin but not necessarily outside sa assignment,” asoy ni Marquez.

Gitataw usab niini nga kon ugaling wala sa assignment area sa polis ang kandidato, hayan dili nila kini ibalhin.

Samtang ang tigpamaba sa Cebu City Police Office nga si Police Senior Inspector Arrieza Otida nagkanayon nga kasamtangan pa silang nanguha og impormasyon kon aduna bay polis sa siyudad nga adunay koneksyon sa magpapili karong eleksyon.

Nasayran nga Marso 29 hangtud sa Mayo 11 ang campaign period alang sa mga lokal nga magpapili gikan sa House of Representatives ngadto sa City ug Municipal councilors.

Hinuon, gidili ang pagpangampanya panahon sa Semana Santa ilabi na sa Huwebes Santo (Abril 18) ug Biyernes Santo (Abril 19) ug sa mismong adlaw sa piniliay, Mayo 13. (/DILT) (BANAT NEWS)