San Fernando ipaubos sa orange code sa EWAs

CEBU, Philippines – Gikan sa yellow code isang-at ngadto orange code sa Election Watchlist Areas (EWAs) ang Lungsod sa San Fernando gumikan sa gituohang presensiya sa usa ka pribadong armadong grupo nga maoy nirakrak sa sakyanan sa mayor ug sa bana niini niadtong Martes sa gabii diha sa Barangay Linao, Dakbayan sa Talisay.

Base sa report sa kapolisan nga girakrakan sa wala mailhing mga armadong tawo kinsa nagsakay og Toyota Hi-ace van ang van nga gisakyan  ni San Fernando Mayor Lakambini “Neneth” Reluya ug sa bana niining si Ricardo “Nonoy” Reluya uban sa ilang drayber ug mga bodyguard.

Ang direktor sa Police Regional Office (PRO)-7 Chief Superintendent Debold Sinas nibutyag nga  gisubay nila karon nga posibleng adunay pribadong armadong grupo nga maoy nisuway og patay  kang Lakambini.

Matud ni Sinas nga si Lakambini nibutyag kanila nga nakadawat kini og mga pagpanghulga sa iyang kinabuhi pinaagi sa text messages ug sa social media.

Si Sinas nagkanayon nga posibleng nahibaw-an sa utok sa krimen ang pattern ni Lakambini matag human sa ilang meeting sa  lungsod.

Nakuha gikan sa lugar nga nahitaboan ang 73 ka basiyo sa bala sa M16 rifle ug adunay tulo gikan sa pistola sa security ni Lakambini dihang nibawos kini.

Kagahapon niumol na og lapad nga Special Investigation Task Group ang kapolisan alang sa maong kaso diin pangulohan kini sa direktor sa Cebu Provincial Police Office ug ubos sa superbisyon ni Police Senior Superintendent Anghelito  Dumangeng, deputy Regional Director for Operations sa PRO-7.

Langkuban usab ang maong SITG sa Criminal Investigation and Detection Group (CIDG)-7 ug sa PNP Anti-Cybercrime Division aron masubay kadtong mga pagpanghulga nga nadawat ni Lakambini. 

Subay niini, paningkamotan nga mabalik sa PRO-7 ang police escort ni Lakambini human sa nahisgutang insidente

Matud ni Sinas nga iyang pakig-estoryahan ang taga Commission on Election (COMELEC) aron pasabton sa sitwasyon.

Sa laing bahin, ang Commission on Human Rights (CHR)-7 personal nga nibisita kagahapon sa Lungsod sa San Fernando alang sa ilang ipahigayon nga motu proprio investigation  kabahin sa nahisgutang insidente.

 Matud ni Leo Villarino, chief investigator nga aduna silay kamanduan gikan sa ilang central office nga mohimo ug motu proprio investigation sa insidente. (Gabriel C. Bonjoc ug Rowena D. Capistrano/BDB)(BANAT NEWS)