Papa nangawat og gatas para sa masuso nga anak
CEBU, Philippines - Drayber og traysikad sa Dakbayan sa Talisay nakahukom sa pagpangawat og gatas gikan sa usa ka tindahan aron nga may mapainom siya sa masuso niyang anak.
Naghilak nga nangayo’g pasaylo si Niño Cabando, 23, taga Sitio Kilawan, Tangke, Talisay human siya madakpi nga nanguha’g duha ka pakete sa baratohon ra nga matang sa gatas nga kantidad og P210 matag usa.
Si Cabando misulod sa usa ka grocery sa Barangay Tangke kagahapon ug mikuha og usa ka putos nga diaper. Matud ni Marycris Cabaña, kawani sa tindahan nga nakabantay sila nga may giluklok si Cabando sa iyang bulsa.
Mogawas na unta si Cabando apan diha nga ilang girekisa, nasuta nga may gitagoan siya nga duha ka paketeng gatas. Matud ni Cabando nga nagkuwang ang iyang kuwarta mao nga nakahimo siya sa pagpangawat.
Ang kinamaguwangan nga anak ni Cabando nag-edad og 5-anyos, ug wala pa’y tuig ang manghod. Wala pa mohukom ang tag-iya sa tindahan kun ila ba nga pasayloon ang suspek. (BANAT NEWS)
- Latest
