Notadong kawatan gipusil patay

CEBU, Philippines — Patay ang usa ka 20-anyos nga lalake nga giingong notadong kawatan ug tulisan human kini gipusil sa makadaghang higayon Sitio Laguna, B. Aranas Extension, Barangay Duljo Fatima, siyudad sa Sugbo, Lunes sa gabii, Nobiyembre 25, 2024.

Ang biktima mao si Guillersol Ocarol, 20, wala'y trabaho ug nagpuyo sa Sitio Laguna, Sta. Monica, B. Aranas Extension, Barangay Duljo Fatima.

Samtang ang suspek nailhan na sa kapulisan apan wala una nila gibutyag ang ngalan tungod kay nagpadayon pa ilang hot pursuit operation.

Sa impormasyon sa Mambaling Police Station ang biktima padung na mouli gikan nagpalit og sud-an dihang kini gisundan siya sa suspek ug walay daghang pangutana gipusil siya niini.

Naigo sa nagkadaiyang parte sa lawas ang biktima nga maoy hinungdan sa iyang hinanaling kamatayon.

Human mahimo ang krimen ang suspetsado nga nagsul-ob og itom nga long sleeve sweatshirt ug basketball jersey shorts nga puti ug yellow dali- daling misibat.

Nagkanayon si Police Major Efren Diaz Jr., hepe sa Mambaling Police Station nga ang biktima usa ka notadong kawatan.

Nadakpan kini sa Carbon Police Station 5 sa miaging semana apan nakagawas tungod kay wala mopasaka  og kaso ang reklamante.

Niadtong Lunes sa kaadlawon matud pa ang biktima gipa-blotter kay nanulis. Gawas niini, nalambigit sab matud pa sa ilegal nga drugas ang biktima.

Nagpadayon ang imbestigasyon sa kapulisan sa maong insidente sa pagpamusil. (BANAT NEWS)