Mga mag-uuma sa Bohol ug Canlaon City nakadawat og ayuda
CEBU, Philippines — Liboan ka mga mag-uuma og humay sa Bohol ang nakadawat og tabang pinansyal gikan sa Department of Agriculture-Central Visayas (DA)-7 pinaagi sa Rice Competitiveness Enhancement Fund-Rice Farmers Financial Assistance (RCEF-RFFA) ug Fuel Discount Voucher (FDV).
Adunay kinatibuk-ang 1,727 ka mag-uuma gikan sa 18 ka lungsod—Alburquerque, Antequera, Baclayon, Balilihan, Calape, Cortes, Loay, Sevilla, Sikatuna, Corella, Maribojoc, San Isidro, Bilar, Dimiao, Lila, Loboc, Catigbian, Valencia—ug gikan sa Tagbilaran City ang nakadawat og tag P5,000.00 nga cash assistance.
Dugang pa, 395 ka mga mag-uuma sa samang lungsod ug siyudad nga nakadawat ug nanag-iya og mga agri-machineries interventions nakadawat sa ilang fuel subsidy nga P3 mil matag usa aron makatabang sa ilang operasyon sa pag-uma sama sa pag-andam sa yuta hangtod sa post-harvest.
Samtang dul-an sa 2,500 ka mga mag-uuma og humay sa Canlaon City, Negros Oriental nakadawat og mga suplay alang sa rice farming pinaagi sa Rice Program sa ahensya.
Naglakip kini sa 1,300 ka sako sa hybrid rice seeds alang sa ting-init, 4,596 ka pakete sa bio-fertilizers ug 4,694 ka sako sa inorganic fertilizer alang sa ting-ulan nga nikantidad og P 10,702,859.
Matud ni Alejandro Rafal, ang Agricultural Program Coordinating Office (APCO) sa Negros Oriental, tumong sa maong interbensyon nga mapataas ang produktibidad sa uma ug kita sa mga mag-uuma padulong sa sufficiency sa pagkaon.
Ang DA-7 niingon nga kining mga hinabang alang sa mga mag-uuma og humay nga kwalipikadong benepisyaryo nga narehistro sa Registry System for Basic Sectors in Agriculture (RSBSA). (BANAT NEWS)
- Latest
