Human sa filing sa COC, mga kandidato gi-monitor

CEBU, Philippines –  Sa pagtapos sa filing sa certificate of candidacy niadto’ng Biyernes, nagsugod na usab ang kapolisan sa Police Regional Office-7 sa pagsusi kung unsa nga mga lugar sa rehiyon ang medyo init ang politika. Matud ni Senior Superintendent Rey Lyndon Lawas, hepe sa Directorial Staff sa PRO-7, nga padayon na ang ila’ng pag-monitor sa tanang lugar sa Central Visayas aron mahibaw-an kung asa dapit ang medyo init ang panagribal sa mga kandidato.

Hinuon, matud niya nga sa pagkakaron, sayo pa kaayo aron makaingon nga aduna’y lugar nga nanginahanglan og dugang seguridad gikan sa kapolisan mahitungod sa umaabot nga eleksiyon apan matud niya nga wala gyud sila mokompiyansa.

“We are having our periodic assessment as far as election is concerned,” matud ni Lawas. Subay niini, matud ni Lawas nga ila na nga gimanduan ang mga directors sa kapolisan sa mga siyudad ug probinsya sulod sa rehiyon sa pag-submit sa PRO-7 og lista sa mga kandidato nga ni-file sa ila’ng COC aron sila makapangandam kung kinsa kadto ang posible nga mo-request og seguridad gikan sa kapolisan.

Matud ni Lawas nga magbase pud sila gikan sa Commission on Elections kung kinsa kadto ang ila’ng tugutan nga mahatagan og seguridad gikan sa kapolisan.

“Kay naa man gud sa provision sa Comelec Resolution nga ila’ng gipagawas niadto’ng August 18 nga kung naa gyu’y threat to life ani niang mga kandidato, they should file a formal request to the Comelec,” matud ni Lawas. Base sa calendar of activities sa Comelec, magsugod ang gun ban karong Enero ug kini maglakip na sa mga pagbalhin og area sa kapolisan labi na kadto’ng adunay paryente o suod nga karelasyon gikan sa mga kandidato sa ila’ng lugar.  (BANAT NEWS)