Supporters ni JVR mireklamong mga paryente niini maoy nakatrabaho

CEBU, Philippines - Mga sakop sa pamilya sa mayor sa dakbayan sa Talisay nga si Mayor Johny Delos Reyes nga gikan pa sa Mindanao ang gipasiguro og patrabaho sa city hall hinungdan nga daghan sa iyang supporters ang nagbagulbol.

Ang city administrator karon  nga si John Yre De los Reyes anak kini sa mayor ug ang secretary niini ilaha usab nga paryente.

Gawas niini giingong ang asawa ni Yre ang naa usab sa iyang buhatan sa city hall nagtrabaho. Ang maguwang sa mayor nga si Joel De los Reyes mao karon ang head sa motorpool sa Talisay.

Ang asawa usab ni Kagawad Clifford De los Reyes sa barangay Bulacao ang giingong naa usab magtrabaho sa buhatan ni Pastor Solomon Paypa ubos sa buhatan sa mayor. Si Paypa maoy legal consultant sa mayor.

Samtang ang drayber karon sa mayor giingong iyaha rang ig-agaw ug gawas niini giingong duna usab siya’y mga paryente nga gipatrabaho nga manilhigay sa merkado ug ngadto sa laing departamento.

Si Konsehal Dennis Basillote nga nahinabi sa mga tigbalita nagkanayon kini nga bisan kinsa pay mohupot sa pamunoan dili kalikayan nga mopasulod gyud kini sa ilang mga paryente.

Apan matud ni Basillote nga magbaton lang unta og delicadeza ang mayor ug giuna unta niya pagtagad ang mga Talisaynong iyang gisaaran inay unahon ang iyang mga paryente nga makatrabaho.

Si De los Reyes nga nahinabi sa mga tigbalita kagahapon miangkon nga duna siya’y mga paryente nga gipasulod diha sa city hall apan matud niya wala pa sila makadawat og sweldo.

Gipasalig niyang ang iyang mga paryente mamauli ra unya ngadto sa Mindanao kung duna na siya’y mapiling mga tawo nga kasaligan nga moalalay kaniya sa iyang mga gimbuhaton.

Matud niya human sa iyang 100 days sa serbisyo mawala na usab ang iyang mga paryente diha sa city hall.

Kabahin sa mga nasagmuyo nga supporters, si Delos Reyes miingon nga nakig-alayon na siya sa MEPZA tungod kay dunay pabrika nga nagkinahanglan og sobra sa 1,000 ka mga empleyado ug misaad kining manawat og mga Talisaynon.

Giklaro usab niyang walay sweldo ang iyang mga consultants kay boluntaryo silang mitrabaho.

Kahinumduman nga si De los Reyes milaslas sa mga job order sa city hall gikan 2,000 ka mga JO gihimo na lang 1,200 sugod kagahapon.

Sa laing bahin, si Hazel Bathan, hepe sa human resource office sa Talisay mibutyag nga ang mayor duna kini 525 ka mga quota sa JO lakip na kini sa mga gihatag nga quota sa mga kapitan sa 22 ka barangay ug sa mga department heads sa city hall. (/EIM) (BANAT NEWS)