Tunnel sa SRP siradohon sugod karon

CEBU, Philippines — Nangandam ang City of Talisay-Traffic Operations and Development Authority sa posibleng paghuot sa dagan sa trapiko atol unya sa temporaryong pagsirado sa tunnel sa South Road Properties tungod kay ipaubos kini sa renovations sugod karong adlawa.

Ang Department of Public Works and Highways maoy mopahigayon sa nahisgutang renovation sa tunnel diin ang pagsirado sa SRP tunnel molungtad kini sa unom ka buwan.

Nasayran nga ang DPWH adunay nakitang hairline cracks atol sa ilang gipahigayong inspection.

Napanglantawan nga maapektohan ang dagan sa trapiko sa Dakbayan sa Talisay sa pagtak-op sa tunnel.

Ang pangulo sa CT-TODA Jonathan "Joy" Tumulak nibutyag nga ang mga traffic enforcer molugway sa ilang serbisyo ngadto sa pipila ka bahin sa Siyudad sa Sugbo ilabi na diha sa mga boundary aron mabantayan ang dagan sa trapiko.

Ug usa sa ilang gipangandaman mao ang pagbalik sa klase diin daghang sakyanan nga magsaoy-saoy atol sa peak hours.

Dugang ni Tumulak nga padayon ang ilang pakig-alayon sa Road Management Authority alang sa ilang hiniusa nga lihok aron mamenosan ang grabeng traffic unya nga masinati.

Gibuksan ngadto sa publiko ang traffic lights nga adunay Artificial Intelligence (AI) sa usa ka bahin sa SRP.

Base sa taho sa Cebu City Information Office nga ang pormal nga pag-abli niini nga feature apil usab ang access road gikan sa El Pardo paingon sa Vestil St. duol sa taytayan paingon sa Mambaling diin gipahigayon kini kagahapon sa alas 5:00 sa hapon.

Gikataho nga pormal nga ablihan ni Acting Cebu City Mayor Raymond Alvin Garcia uban sa ubang opisyales sa siyudad ang pasilidad sa intersection uban sa venture partner nga Filinvest Land, Inc. (FLI). —Gabriel C. Bonjoc, Iris Hazel Mascardo (BANAT NEWS)