Katukoran sa 5G tower sa Telco gisupak sa mga residente

CEBU, Philippines — Nagpakitabang ang mga residente sa St. Jude Acres sa Barangay Bulacao, Dakbayan sa Sugbo ngadto sa Cebu City Council tungod sa gipahigayong pagtukod og 5G tower nga nakapabalaka kanila ang posibleng epekto niini sa panglawas.

Atol sa executive session gahapon gihatagan og higayon ang mga residente nga mopadayag sa ilang sentimento ug pagkontra sa pagpatukod sa nahisgutang tower sa Telco diha sa Phase 4 sa dalan Waling-Waling.

Si Jesie Pastrana kinsa kapin sa 30 katuig na nga residente sa lugar nipadayag sa konseho sa iyang kabalaka sa katukoran sa nahisgutang tower.

Si Cebu City Councilor Nestor Archival, Sr. nangamahan sa resolusyon alang sa executive session kalabot sa kahimtang sa mga residente diin ang usa sa rekisitos sa pagpatukod sa imprastraktura mao ang pagtugot sa mga  residente.

Lakip sa nitambong sa executive session si Bulacao Barangay Captain Junah Abellanosa ug niangkon nga dili familiar kaniya ang ISON Tower, ang kompaniya nga nagpatukod sa maong tower.

Iyang gihangyo ang mga representante sa ISON Tower nga moagi una sa public hearing.

Dugang niya nga ang nag-unang gikahadlokan sa mga residente ang epekto sa ilang panglawas tungod sa tower.

Sa pagkakaron wala pa masugdi sa pagtukod ang tower.

Matud ni Abellanosa nga adunay napakitang mga dokumento gikan sa Department of Health (DOH) ug uban pa'ng mga dokumento sama sa business permit ang hingtungdang kompaniya.

Apan gusto ni Abellanosa nga maggikan sa konseho ang desisyon kalabot sa problema.

“For my side, I also have to protect my people”, padayag ni Abellanosa.

Ang representante sa Office of the Building Official (OBO) Architect Emmanuel Dizon nagkanayon nga giisyuhan nila og building permit ang ISON Towers niadtong Marso 1, 2024.

Apan giklaro ni Dizon nga ilang huwaton ang desisyon sa konseho ug ang formal complaint kalabot sa pagpatukod sa tower. (BANAT NEWS)