Mayor Chan modonar sa iyang daug

CEBU, Philippines — Idonar ni Lapu-Lapu City mayor Junard "Ahong" Chan ang iyang premyo sa Pasigarbo sa Sugbo nga Mayors Best Introduction Video nga P500mil.

Gipahibawo ni mayor Chan nga iyang idonar sa Saint Augustine Parish sa Barangay Santa Rosa Olango Island ang maong kantidad alang sa proyekto sa simbahan atol sa misa sa kapistahan.

Ang mayor nakighinabi kang Msgr. Renato Beltran, Chancellor sa Archdiocese of Cebu uban sa mga kaparian nga gipangulohan sa kura paroko sa simbahan nga si Fr. Edgard Lumarda.

Si Chan kauban ni kongresista Ma. Cynthia Chan kinsa maoy Hermano ug Hermana Mayor nitambong sa kalihukan sa misa sa Fiesta.

Ang parokya adunay nagpadayon nga proyekto nga pag-ayo sa simbahan, reconstruction sa sementeryo ug pagguba ug pagtukod sa bag-ong kumbento.

Matud pa ni Chan tungod sa iyang daug iyaha kining itunol sa simbahan aron adunay magasto sa nagpadayon nga proyekto.

Tungod kay hapit naman usab ang iyang birthday sa September 8, hinungdan iyang gihangyo ang iyang kapikas nga si Cindi nga tugbangan ang iyang idonar ug P500mil usab isip iyang birthday gift kay ipuno niya paghatag sa simbahan nga giuyonan usab sa iyang asawa.

Ang donasyon ni Chan, gikalipay usab sa mga tawo nga nanambong sa Santos nga misa ug mga opisyal sa simbahan kay makapadayon man kini sa ilang proyekto. — MEL BANAT NEWS