Patay’ng lawas sa taxi driver nabangalan sa kadagatan

CEBU, Philippines — Nagpadayon sa ilang pakisusi ang mga imbestigador sa Mandaue City Police Office (MCPO) kabahin sa kamatayon sa usa ka taxi driver  diin ang lawas niini napalgang naglutaw sa niadtong Martes sa buntag diha sa kadagatan ilawom sa Marcelo Fernan Bridge sa Barangay Umapad, Siyudad sa Mandaue.

Giila ang maong taxi driver sa iyang mga kabanay nga mao si Ruben Zamora Remolino, hingkod ang panuigon, molopyo sa Lungsod sa Consolacion. Si Police Lieutenant Colonel Mercy Villaro, tigpamaba sa MCPO nagkanayon nga ang mga tawo sa maong dapit nakamatikod nga ang taxi nga gidala sa biktima duha na ka adlaw ang nakalabay nga nag-parking sa may entrance sa Pajara Park.

Matud ni Villaro nga ang mga kabanay sa maong taxi drayber nibutyag nga nisuway na kini sa pagkutlo sa iyang kinabuhi kaniadto.

Giklaro ni Villaro nga mohimo gihapon sila og pakisusi tungod kay posible nga adunay foul play ang kamatayon niini tungod sa mga bun-og sa nawong ug bukton sa biktima. (BANAT NEWS)