Rama gisaway ni Osmeña kay di makamaong mangita og pundo

CEBU, Philippines - Si kanhi kongresista Tomas Osmeña misaway ni Mayor Michael Rama tungod kay giingong dili kini maantigo mangita og kwarta aron iyang magamit pagpatuman sa gusto niya nga mga proyekto para dinhi sa dakbayan.

Sa wala pa molarga sa Japan si Rama kaniadtong Biyernes, iyang gibutyag nga ipatan-aw gyud niya sa mga abogado sa dakbayan kun unsa’y mga legal nga lakang nga mahimo kabahin sa wala pagdayon ni Osmeña sa P400 milyones nga para unya diha sa south district.

Ang P400 milyones gamiton unta ni Osmeña pagpasemento sa mga karsada diha sa south district apan gibabagan ni Rama tungod kay matud niya ang maong mga karsada maayo pa kaayo kini ug gusto niyang adto ipagamit sa north district.

Apan si Osmeña mipasabot nga ang kantidad dili kabahin sa iyang Priority Development Assistance Fund (PDAF) iya kadto sa Department of Public Works and Highways (DPWH)  ug siya lang ang gipapangita og karsada diha sa south district ang angayang sementuhon.

Matud ni Osmeña nga dihang si kanhi Kongresista Eduardo Gullas nangita’g pundo nga magamit pagpasemento sa karsada sa Naga City ug ubang dapit sa first district iyang giingnan nga dunay kwarta nga wala niya magamit nga gipagahin unta sa DPWH para sa dakbayan.

Si Osmeña miingon nga si Rama angay’ng mangita og kaugalingon niya nga tininguhaan aron makakuha siya’g pundo alang sa gusto niya nga mga proyekto. (BANAT NEWS)