Mga kaswal nga adto pusta sa ‘pikas’ kutob na lang Hunyo 30
CEBU, Philippines - Ang mga kaswal nga kawani sa Cebu City Hall nga wala na hikutra ang ilang mga papeles sa ilang kontrata sa panarbaho dili na kinahanglang mo-report sa ilang trabaho sugod karong Hulyo 1.
Sa Memorandum Order nga giluwatan ug gipetsahan og Hunyo 11, si Mayor Michael Rama mipahinumdom sa mga kaswal nga kawani sa City Hall nga ang ilang serbisyo mapupos unya sa Hunyo 30 mao nga dili na kinahanglan nga moreport sila pagka Hulyo 1.
“You are further advised that you are required to report on July 1, only if a renewal of your casual appointment shall have been processed,†matud sa mayor sa iyang memorandum.
Ang dakbayan sa Sugbo adunay kapin sa 3,000 ka kaswal nga nadistino sa lainlaing opisina ug departamento sa City Hall.
Human makabasa sa kamandoan sa mayor gihakop og tumang kabalaka ang mga kawani kay kun sila matahapan nga didto miabin sa kontra sa mayor sa miaging eleksyon, sigurado na sila nga dili marenyohan sa ilang kontrata.
Daan na nga si Rama mipahibalo nga dili gyud siya ganahan nga makig-uban og trabaho sa mga tawo nga atua mialalay sa iyang mga kontra sa politika, ilabi na kun sila mga ligoy, kawatan ug mga entrigero.
Pagkakaron adunay team nga gimugna si Rama nga mihashas sa mga dukomento sa mga kaswal aron hukman kinsa kanila ang ipabilin. (/EIM) (BANAT NEWS)
- Latest
